Chandrababu : రెండు రోజుల్లో విడుద‌ల కానున్న చంద్ర‌బాబు..?

Chandrababu : ఏపీ స్కిల్ డెవలప్‌మెంట్ స్కాంలో అరెస్ట్ అయి రాజమండ్రి సెంట్రల్ జైలులో రిమాండ్‌లో ఉన్న చంద్రబాబు నాయుడు దాఖలు చేసిన క్వాష్ పిటీషన్‌పై ఏపీ హైకోర్టులో హోరా హోరీగా వాద‌న‌లు సాగాయి. చంద్రబాబు తరపున సుప్రీంకోర్టు ప్రముఖ న్యాయవాదులు హరీశ్ సాల్వే, సిద్ధార్ధ్ లూథ్రాలు వాదనలు విన్పించగా, సీఐడీ తరపున ముకుల్ రోహత్గీ వాదించారు.చంద్రబాబు అరెస్టులో సీఐడీ సరైన నియమావళి పాటించలేదని, గవర్నర్ అనుమతి తీసుకోలేదని తెలిపారు. ప్రీవెన్షన్ ఆఫ్ కరప్షన్ యాక్ట్ సెక్షన్ 17 ఏ ప్రకారం అరెస్టు జరిగినప్పుడు గవర్నర్ అనుమతి ఎందుకు తీసుకోలేదని ప్రశ్నించారు.

2020లో నమోదైన ఎఫ్ఐఆర్‌లో చంద్రబాబు పేరు లేద‌ని, ఆయ‌న‌ని అస‌లు ఎలా అరెస్టు చేస్తారని ప్రశ్నించారు. 2024 ఎన్నికల్ని దృష్టిలో ఉంచుకుని ప్రతీకారం కోసం ఇదంతా చేశారని వాదించారు. ఎక్కడా సాక్ష్యాల్ని తారుమారు చేయలేదని వివరించారు. ఈ సందర్భంగా అర్నబ్ గోస్వామి కేసులో కోర్టు తీర్పును ప్రస్తావించారు. స్కిల్‌ డెవలప్‌మెంట్‌ కేసులో చంద్రబాబు క్వాష్‌ పిటిషన్‌ దాఖలు చేయ‌గా, రిమాండ్ రివ్యూ పిటిషన్‌ కూడా దాఖలైన సంగతి తెలిసిందే. జ్యుడీషియల్‌ రిమాండ్‌ ఉత్తర్వులను కొట్టివేయాలని పిటిషన్‌లో చంద్రబాబు కోరిన విషయం తెలిసిందే. చట్టవిరుద్ధంగా అరెస్ట్‌ చేశారంటూ చంద్రబాబు తరఫున సుప్రీంకోర్టు న్యాయవాది సిద్ధార్థ లూథ్రా వాదనలు వినిపించారు.

ఎఫ్ఐఆర్ నమోదైన వెంటనే చంద్రబాబుని అరెస్టు చేయలేదని, కేసు నమోదైన రెండేళ్లవరకూ సాక్ష్యాధారాలు సేకరించి అప్పుడు అరెస్టు చేశారని చెప్పారు. ఈ కేసులో పోలీసులకు పూర్తి స్వేచ్చనిస్తూ క్వాష్ పిటీషన్ కొట్టివేయాలని కోరారు. సెక్షన్ 319 ప్రకారం ఎన్ని ఛార్జిషీట్లైనా వేయవచ్చన్నారు. ఎంతమంది సాక్షులనైనా కేసులో చేర్చవచ్చన్నారు. 371 కోట్లు ఎక్కడికి వెళ్లాయనేది నిగ్గు తేల్చాలని, ఈ కేసులో షెల్ కంపెనీల జాడ బయటకు తీస్తున్నామన్నారు. ఫోరెన్సిక్ ఆడిట్ ద్వారా నిదుల దుర్వినియోగం జరిగినట్టు చెప్పారు. అయితే క్వాష్ పిటీషన్‌పై హోరాహోరీ వాదనల అనంతరం ఏపీ హైకోర్టు తీర్పు రిజర్వ్ చేసింది. తీర్పు ఎలా వస్తుందనే ఆసక్తి సర్వత్రా నెలకొంది. చంద్ర‌బాబు విడుద‌ల కావ‌డం ఖాయ‌మ‌ని తెలుగు త‌మ్ముళ్లు ఆశాభావం వ్య‌క్తం చేస్తున్నారు.