క్షీణించిన వినోద్ కాంబ్లి ఆరోగ్యం.. హాస్పిట‌ల్‌లో చికిత్స‌..

భార‌త క్రికెట్ జ‌ట్టు మాజీ ప్లేయ‌ర్ వినోద్ కాంబ్లి ప‌రిస్థితి ప్ర‌స్తుతం విష‌మంగా ఉన్న‌ట్లు వార్త‌లు వ‌స్తున్నాయి. కుటుంబ స‌భ్యులు ఆయ‌న‌ను థానేలోని ఓ హాస్పిట‌ల్‌లో చేర్పించి చికిత్స అందిస్తున్నారు. కాంబ్లీ వ‌య‌స్సు 52 ఏళ్లు కాగా ఆయ‌న చికిత్స‌కు స‌హ‌క‌రిస్తున్నార‌ని వైద్యులు చెబుతున్నారు. కానీ ఆయ‌న ప‌రిస్థితి విష‌మంగానే ఉంద‌ని చెప్పారు. ఈ క్ర‌మంలోనే వైద్యుల బృందం కాంబ్లీ ఆరోగ్య ప‌రిస్థితిని స‌మీక్షిస్తోంది. అవ‌స‌ర‌మైన అన్ని ర‌కాల ప‌రీక్ష‌లు చేస్తున్నారు.

కాగా వినోద్ కాంబ్లీ హాస్పిట‌ల్‌లో చికిత్స పొందుతున్న ఫోటోలు, వీడియోలు సామాజిక మాధ్య‌మాల్లో వైర‌ల్‌గా మారాయి. వాటిని చూసిన వారంద‌రూ కాంబ్లీ త్వ‌ర‌గా కోలుకోవాల‌ని కోరుతున్నారు. అయితే ఇటీవ‌లే ముంబైలోని శివాజీ పార్క్ మైదానంలో దివంగత కోచ్ రమాకాంత్ అచ్రేకర్ స్మారకార్థం ఓ ప్రత్యేక కార్యక్రమం నిర్వహించారు. అచ్రేకర్ శిష్యులు అయిన సచిన్ టెండూల్కర్, వినోద్ కాంబ్లీ ఈ కార్యక్రమానికి హాజరయ్యారు. ఈ సందర్భంగా వీల్ చైర్‌లో కూర్చున్న వినోద్ కాంబ్లీ పరిస్థితి చూసి అందరూ షాక‌య్యారు. ఆయ‌న‌ సరిగ్గా లేచి నిలబడలేకపోయారు. కనీసం మాట్లాడలేకపోయారు.

దీంతో కాంబ్లీ దీన పరిస్థితి చూసిన మాజీ క్రికెటర్ కపిల్ దేవ్ ఆయ‌న‌కి సహాయం చేయడానికి ముందుకొచ్చారు. సాయం అందుకునేందుకు కాంబ్లీ సైతం సంసిద్ధత వ్యక్తం చేశారు. రిహాబిలేషన్‌ సెంటర్‌కు వెళ్లేందుకు తాను సిద్ధమేనని, అక్కడికి వెళ్లేందుకు తనకెలాంటి భయం లేదన్నారు. ఇంతలోనే కాంబ్లీ ఆస్పత్రి పాలు కావడం క్రికెట్ అభిమానులను కలవరపాటుకు గురి చేస్తోంది. కాంబ్లీ త్వ‌ర‌గా కోలుకోవాల‌ని మ‌రోవైపు స‌చిన్ అభిమానులు కూడా ప్రార్థిస్తున్నారు.