ట్రైన్‌లో టీ తాగుతున్నారా.. అయితే ఈ వీడియో చూస్తే ఇక‌పై అలా తాగ‌రు..!

ట్రైయిన్‌లో మనకు రకరకాల పదార్థాలు అమ్ముతుంటారు. ఒక్కోసారి తప్పని పరిస్థితుల్లో దూర ప్రయాణాలు చేయాల్సి వస్తే అక్కడ ఏం అమ్ముతుంటే అవి కొనుక్కుని తినక తప్పదు. అయితే జనాలు ఎక్కువగా తాగేది టీ లేదా కాఫీ. ఎందుకంటే కాసేపు రిలాక్స్‌ అవ్వడానికి చిన్న కప్పు టీ పడితే చాలు అని చాలా మంది భావిస్తారు. రైలు ప్రయాణాల్లో వేడి వేడి చాయ్ అని కూత వినపడటం మనం ఎప్పుడూ చూసేది. ఆ కూత వినపడగానే టీ తాగే అలవాటు ఉన్నవారిలో ప్రాణం లేచినట్లవుతుంది.

ఇక్కడి వరకు అంతా బాగానే ఉన్నా.. ఈ వార్త చదివాక మరోసారి అలాంటి సాహసం చేయకపోవచ్చు. ఎందుకంటే.. రైలు ప్రయాణాల్లో అమ్మే చాయ్ ఇలా వేడిచేస్తారంటూ ఒక ప్రయాణికుడు.. చాయ్ వేడి చేసే విధానాన్ని వీడియో తీసి దాన్ని సోషల్ మీడియాలో పోస్ట్ చేశాడు. వీడియోలో ఉన్న దాన్ని బట్టి.. రైలులో టీ అమ్మే ఒక వ్యక్తి టీని వేడి చేయడం కోసం శుభ్రంగా లేని ఒక హీటర్ ఉపయోగించి వేడి చేశాడు. దీన్ని గుర్తించిన ప్రయాణికులు అతడు వేడి చేసే విధానాన్ని వీడియోగా చిత్రీకరించారు.

సదరు వ్యక్తి పక్కనే ఉన్నప్పటికీ నోరు మెదపక పోవడం గమనార్హం. ఈ ఘటన శబరి ఎక్స్‌ప్రెస్‌లో చోటుచేసుకుంది. పలువురు ప్రయాణికులు శబరి ఎక్స్‌ప్రెస్‌లో విక్రయించే ఆహరపానీయాలు చాలా ఘోరంగా ఉంటాయని చెబుతున్నారు. ప్రస్తుతం నెట్టింట ఈ వీడియో తెగ వైరల్‌ అవుతోంది. దీంతో నెటిజన్లు ఇలాంటి కాంట్రాక్టును రద్దు చేసి సదరు వ్యక్తులపై చర్యలు తీసుకోవాలని డిమాండ్ చేస్తున్నారు. ఇన్నాళ్లు నేను తాగిన చాయ్ కూడా ఇలానే చేశారా..? అంటూ కొందరు తమకు జరిగిన అనుభావాలను కామెంట్ల రూపంలో పోస్ట్ చేస్తున్నారు.