Premikudu Movie : ప్రేమికుడు సినిమాని మ‌ధ్య‌లో గ‌వ‌ర్నర్ ఎందుకు ఆపేయ‌మ‌న్నారు..?

Premikudu Movie : స్టార్ డైరెక్ట‌ర్ శంక‌ర్ సినిమాల గురించి ప్ర‌త్యేకంగా చెప్ప‌న‌క్క‌ర్లేదు. ఆయ‌న సినిమాలు ఎంత పెద్ద సెన్సేష‌న్ క్రియేట్ చేస్తున్నాయో మ‌నం చూస్తున్నాం. వరుస హిట్లతో దక్షిణాది లోనే కాదు ఉత్తరాదిలో కూడా తనకంటూ ఓ క్రేజ్ ని క్రియేట్ చేసుకున్నాడు. 1993లో వచ్చిన ‘జెంటిల్ మ్యాన్’ సినిమాతో మొదలైన ప్రస్థానం భారీచిత్రాల స్థాయికి వెళ్ళింది. జెంటిల్ మ్యాన్ మూవీ నిర్మాత కుంజుమన్ కు కాసుల వర్షం కురిపించింది. ఈ హిట్ తరువాత నిర్మాత కుంజుమన్ డైరెక్టర్ శంకర్ తో ఇంకో చిత్రం చేయాలని నిర్ణయించుకున్నాడు. అప్పుడు శంకర్ ప్రేమికుడు మూవీ స్టోరిని నిర్మాతకి వినిపించారు.

ఇది న‌చ్చ‌డంతో మూవీ సెట్స్ పైకి వెళ్లింది. సినిమా సూప‌ర్ డూప‌ర్ హిట్ అయింది. నగ్మ హీరోయిన్ గా నటించిన ఈ పిక్చర్ బాక్సాఫీసు వద్ద వసూళ్ల వర్షం కురిపించింది. ‘ప్రేమికుడు’ సినిమాలో గవర్నర్ కుట్రలు చేస్తాడనే విషయం సినిమా షూటింగ్ సందర్భంలో గవర్నర్ కార్యాలయానికి వెళ్లిందట. దాంతో గవర్నర్ ఆఫీసు నుంచి షూటింగ్ ఆపేయాలని ప్రొడ్యూసర్ కు, మూవీ యూనిట్ కు వార్నింగ్స్ వచ్చాయని అప్ప‌ట్లో వార్త‌లు వ‌చ్చాయి. అప్పుడు గవర్నర్ గా చెన్నారెడ్డి ఉన్నారు. తమిళనాడు సీఎంగా జయలలిత ఉండగా, ఆమె వద్దకు మేకర్స్ వెళ్లారట. అప్పుడు సినిమాలో ఎలాంటి వివాదాస్పద సన్నివేశాలు పెట్టొద్దని చెప్తూ సీఎం అనుమతి ఇచ్చిందని టాక్.

అలా సినిమా షూటింగ్ సమయంలో ప్రేమికుడు చిత్రం కొన్ని ఇబ్బందులు ఎదుర్కొంది. కానీ, ఆ తర్వాత ఈ సినిమా విడుదలై సూపర్ హిట్ అయింది.1994 లో సెప్టెంబర్ 17న విడుదలైంది. ఈ సినిమా కమర్షియల్ గా ఘన విజయాన్ని అందుకుంది. అది మాత్రమే కాకుండా 2 ఫిల్మ్‌ఫేర్ అవార్డులు, 4 జాతీయ చలనచిత్ర అవార్డులతో పాటు ఎన్నో గుర్తింపులను కూడా ద‌క్కించుకుంది. ప్రేమికుడు చిత్రంలోని పాట‌లు ఇప్ప‌టికీ ఎక్క‌డో చోట మారుమ్రోగుతూనే ఉంటాయి.