PM Modi : వ‌ర‌ల్డ్ క‌ప్ ఓడిన త‌రువాత ప్ర‌ధాని మోదీ ఎలా ధైర్యం చెబుతున్నారో చూడండి..!

PM Modi : వ‌న్డే వ‌ర‌ల్డ్ క‌ప్ 2023లో భార‌త్ అద‌ర‌గొడుతుంద‌ని, ట్రోఫీ క‌చ్చితంగా కొడుతుంద‌ని అంద‌రు అనుకున్నారు. సెమీస్ వ‌ర‌కు వ‌రుస విజ‌యాలు అందుకున్న భార‌త్ ఫైన‌ల్‌లో బొక్క‌బోర్లా ప‌డింది. ఆసీస్ ముందు స్వ‌ల్ప ల‌క్ష్యాన్ని ఉంచిన భార‌త్ ఆ ల‌క్ష్యం కాపాడుకోలేక ట్రోఫీని కోల్పోవ‌ల‌సి వ‌చ్చింది. దీంతో ఎన్నో ఆశ‌లు పెట్టుకున్న అభిమానుల‌కి నిరాశే మిగిలింది. మ‌రోవైపు రోహిత్‌, విరాట్ లాంటి ఆట‌గాళ్ల‌కి ఇది చివ‌రి వ‌న్డే వ‌ర‌ల్డ్ క‌ప్ కావ‌డంతో వారు కూడా తీవ్ర నిరాశ‌లో ఉన్నారు. అయితే ఆస్ట్రేలియాతో జ‌రిగిన వ‌న్డే వ‌ర‌ల్డ్‌క‌ప్ ఫైన‌ల్లో భార‌త జ‌ట్టు ఓడిన త‌ర్వాత‌.. ఆట‌గాళ్ల డ్రెస్సింగ్ రూమ్‌కు ప్ర‌ధాని మోదీ వెళ్లారు. క్రికెట‌ర్ల‌లో మ‌నోస్థైర్యాన్ని నింపే ప్ర‌య‌త్నం చేశారు.

కెప్టెన్ రోహిత్ శ‌ర్మ‌, విరాట్ కోహ్లీ భుజాల‌పై చేయి వేసిన మోదీ వారితో ముచ్చటించారు. ఇలాంటివి జ‌రుగుతుంటాయ‌ని, మ‌నోధైర్యాన్ని కోల్పోవ‌ద్దు అన్న సందేశాన్ని ఇచ్చారు. వ‌రుస‌గా 10 మ్యాచ్‌ల‌ను గెలిచార‌ని, మిమ్మ‌ల్ని క‌ల‌వాల‌నిపించింద‌ని, ఒక్క మ్యాచ్ ఓడిపోవ‌డం స‌హ‌జ‌మే అని, మీరు న‌వ్వుతూ ఉండాల‌ని, దేశం మిమ్మ‌ల్ని చూస్తోంద‌ని మోదీ చెప్పుకొచ్చారు. జ‌డేజాతో మాట్లాడుతూ క్యా బాబూ అని పిలిచిన ప్ర‌ధాని.. నువ్వేదైనా గుజ‌రాతీలో మాట్లాడు అని అన్నారు. ష‌మీని ద‌గ్గ‌ర‌కు తీసుకొని చాలా బాగా ఆడావ‌ని అత‌నికి కితాబు ఇచ్చారు. బుమ్రాతోనూ మాట్లాడుతూ నీకు గుజ‌రాతీ వ‌చ్చు కాదా అని అన్నారు.

టోర్నీ మొత్తం అద్భుతంగా ఆడార‌ని, అంద‌రు ఒక్క‌టి ఉండాల‌ని, ఒక‌ర్ని ఒక‌రు ప్రోత్స‌హించుకోవాల‌ని, ఒక‌వేళ మీరు ఫ్రీగా ఉంటే, మ‌నం ఢిల్లీలో ఓసారి కలుసుకుందాం అని ప్ర‌ధాని అన్నారు. ఢిల్లీకి రావాలంటూ క్రికెట్‌కు మోదీ ఆహ్వానం ప‌లికారు.షమీ తన సోషల్ మీడియాలో మోడీని కౌగిలించుకున్న ఫొటోను పోస్ట్ చేశాడు. ఈ ఫొటోతో పాటు క్యాప్షన్‌లో, డ్రెస్సింగ్ రూమ్‌కి వచ్చి జట్టు ఆటగాళ్లను ఉత్సాహపరిచినందుకు ప్రధానికి ధన్యవాదాలు తెలిపాడు. భారత జట్టు స్పిన్నర్ రవీంద్ర జడేజా కూడా ప్రధాని మోదీతో దిగిన ఫొటోను షేర్ చేశాడు. టీమ్ ఇండియా టోర్నీ ఆసాంతం బాగా ఆడిందని, అయితే ఫైనల్స్‌లో జట్టు రాణించలేకపోయిందంటూ జడేజా రాసుకొచ్చాడు.