Panchatantram Movie : ఇటీవ‌ల ఓటీటీ హ‌వా న‌డుస్తున్న విష‌యం తెలిసిందే.థియేట‌ర్‌లో రిలీజైన సినిమాల‌తో పాటు డైరెక్ట్ ఓటీటీ సినిమాలు కూడా ప్రేక్షకుల‌ని అల‌రిస్తున్నాయి. ఇటీవ‌ల బ్రహ్మానందం నటించిన పంచతంత్రం సినిమా ఓటీటీలో విడుదల కాబోతుంది. కోలీవుడ్ నటుడు సముద్రఖని, ముద్దగుమ్మ కలర్స్ స్వాతి , బ్యూటిఫుల్ శివాత్మిక రాజశేఖర్, యంగ్ హీరో రాహుల్ విజయ్, దివ్య శ్రీపాద, మత్తు వదలరా ఫేమ్ నరేష్ అగస్త్య, శ్రీ విద్య ప్రధాన పాత్రలుగా నటించిన అంథాలజీ పంచతంత్రంకి హర్ష పులిపాక దర్శకత్వం వహించారు. గతేడాది డిసెంబ‌ర్ 9న థియేట‌ర్స్‌లో విడుదల చేశారు.
ఈ మూవీలోని కాన్సెప్ట్స్‌, న‌టీన‌టుల ప్రతిభ, టెక్నీషియ‌న్స్ టేకింగ్‌కి విమ‌ర్శకుల ప్రశంస‌లు అందాయి. మ‌న శరీరంలోని పంచేద్రియాల‌ను జ్ఞాప‌కాల‌తో అనుసంధానిస్తూ జీవితాన్ని చూడాల‌నే పాయింట్‌తో ఈ అంథాల‌జీని చ‌క్కగా తెర‌కెక్కించార‌ని, అలాగే ఐదు కథల హృద‌య స్పంద‌న‌గా ‘పంచతంత్రం’ను రూపొందించార‌ని విమర్శకులు ఎంతో అభినందించారు. అయితే థియేటర్లలో చూడలేకపోయిన ప్రేక్షకులు ఇప్పుడు ఈ చిత్రాన్ని ఓటీటీలో చూసే అవకాశం ద‌క్క‌నుంది. సాధారణంగా ఓటీటీలు అంటే అమెజాన్ ప్రైమ్, తెలుగు ఓటీటీ ఆహా, డిస్నీ ప్లస్ హాట్ స్టార్, సోనీ లివ్, జీ5, నెట్ ఫ్లిక్స్ ఇవే మ‌న‌కు గుర్తుకు వస్తాయి. ఈ పంచతంత్రం సినిమా మాత్రం ఇందులో అందుబాటులో ఉండ‌దు.
పంచతంత్రం అంథాలజీ సిరీస్ ను ఈటీవీ విన్ లో మాత్రమే అందుబాటులోకి రానుంది. తెలుగు నుంచి వచ్చిన ఇదొక కొత్త ప్లాట్ ఫామ్ కాగా, దీని గురించి ఎవరికీ పెద్దగా తెలియదు. కారణం ఇందులో కొత్త సినిమాలు విడుదల కాకపోవడమే. అందుకే కాలానుగుణంగా మారి ఇప్పుడు పంచతంత్రం సినిమాను కొనుగోలు చేసి డిజిటల్ ప్రీమియర్ చేయ‌బోతున్నారు. . మార్చి 22 నుంచి ఈటీవీ విన్ లో పంచతంత్రం సినిమా స్ట్రీమింగ్ కానుంది. ప్రేమ, భయం, చావు, నమ్మకం, లక్ష్యాలను సాధించడం అనే వేర్వేరు ఐదు కథల సముహారంగా పంచతంత్ర అంథాలజీ సినిమా రూపొందింది. ఓటీటీలో కూడా ఈ సినిమాకి మంచి ఆద‌ర‌ణ ల‌భిస్తుంద‌ని భావిస్తున్నారు.
