Mudragada : ముద్ర‌గ‌డ వైసీపీ చేరిక ఫిక్స్‌.. ఆ సీటు ఖాయం..?

Mudragada : మ‌రి కొద్ది నెల‌లో ఎన్నిక‌ల న‌గారా మోగ‌నుంది. దీంతో అన్ని పార్టీలు కూడా భారీ ఎత్తుగ‌డ‌లు వేస్తూ అధికారం ద‌క్కించుకోవాల‌ని ప్లాన్స్ చేస్తున్నారు. టీడీపీ, బీజేపీ, జ‌న‌సేన పొత్తు పెట్టుకోవాల‌ని భావిస్తుండ‌గా, వైసీపీ మాత్రం సోలో ఫైట్‌కి సిద్ధ‌మ‌వుతుంది. అయితే ఈ క్ర‌మంలో వైసీపీలోకి ప‌లువురు ప్ర‌ముఖుల‌ని ఆహ్వానించేందుకు వైసీపీ సిద్ధంగా ఉన్న‌ట్టు తెలుస్తుంది. కాపు ఉద్యమ నేత ముద్రగడ పద్మనాభం కిర్లంపూడిలోని తన ఇంట్లో అల్పాహార విందు ఏర్పాటు చేశారు. దీనికి వైసీపీ నేతలు, ఎంపీ వంగా గీత, ఎమ్మెల్యే జ్యోతుల చంటిబాబు హాజరయ్యారు.

ఈ ప‌రిస్థితుల‌ని బ‌ట్టి ముద్రగడ పద్మనాభం అధికార వైసీపీలో చేరబోతున్నారనే ప్రచారం జోరుగా సాగుతోంది. కాపు నేతగా, ఉద్యమకారుడిగా గోదావరి జిల్లాల్లో మంచి గుర్తింపు ఉంది. పాత, కొత్త తరం నేతలతో రాజకీయాలు నడిపిన ఘనత ముద్రగడకే ద‌క్కుతుంది. తుని ఘటన తర్వాత మళ్లీ వార్త‌ల‌లో లేని ముద్ర‌గ‌డ‌కి వైసీపీ ఆహ్వానంద అందించిన‌ట్టు ప్ర‌చారం జ‌రుగుతుంది. ఆయ‌న పార్టీలో చేరితే కాకినాడ ఎంపీగా పోటీ చేయించాలని వైసీపీ భావిస్తోందట. అంతేకాదు.. కాకినాడ ఎంపీ స్థానంతో పాటు ప్రత్తిపాడు , పెద్దాపురం ఎమ్మెల్యేగా పోటీచేయొచ్చని ముద్రగడ ముందు మూడు ఆప్షన్‌లను వైసీపీ ఉంచిందట.

2024 అసెంబ్లీ ఎన్నికల్లో జనసేన చీఫ్ పవన్ కళ్యాణ్ పిఠాపురం నియోజకవర్గం నుంచి పోటీ చేయొచ్చనే ప్రచారం జరుగుతోంది. ఈ నేపథ్యంలో.. కాపు ఓటర్లకు ఆకట్టుకోవడానికి.. పవన్ పోటీ చేసే పక్క నియోజకవర్గం నుంచి ముద్రగడను రంగంలోకి దింపాలని వైసీపీ ప్లాన్ చేస్తున్నట్టు తెలుస్తోంది. ఈ నెల 14 నుండి తూర్పుగోదావరి జిల్లా పవన్ పర్యటన ఉండ‌గా, ఈ ప‌ర్య‌ట‌న‌కి జనసేన నుంచి కూడా ముద్రగడ పద్మనాభంకు ఆహ్వానం అందినట్టు తెలుస్తోంది.అయితే ముద్ర‌గ‌డకి ఎమ్మెల్యేగా పోటీ చేయ‌డం ఇంట్రెస్ట్ లేక‌పోతే ఆయన కుమారుడ్ని అయినా సరే వైసీపీలోకి తీసుకోవాలని హైకమాండ్ భావిస్తోందట.