మ‌రో రెండు రోజుల్లో మంచు మ‌నోజ్ అస‌లు విష‌యం చెప్ప‌నున్నాడు.. అంద‌రు వెయిటింగ్..!

ఒక‌ప్పుడు వ‌రుస సినిమాల‌తో అల‌రిస్తూ వ‌స్తున్న మంచు మనోజ్ కాస్త బ్రేక్ ఇచ్చాడు.అయితే ఇటీవ‌ల త‌న రెండో పెళ్లి విష‌యంతో వార్త‌ల‌లో నిలుస్తున్నాడు. నంద్యాల పొలిటికల్ ఫ్యామిలీకి చెందిన భూమా మౌనికతో కలిసి ఇటీవ‌ల తరచుగా కనిపిస్తున్నారు మ‌నోజ్. గత ఏడాది వినాయక చవితి పండుగ దినాల్లో మౌనిక-మనోజ్ కలిసి ప్రత్యేక పూజలు చేయ‌డంతో పాటు వినాయక మండపాన్ని సందర్శించారు. ఆ ఫోటోలు వైరల్ కావ‌డంతో వీరిద్ద‌రు పెళ్లి చేసుకోనున్నార‌ని ప్ర‌చారం జ‌రిగింది. భూమా నాగిరెడ్డి జయంతి పురస్కరించుకొని మనోజ్ ఓ ట్వీట్ వేశారు. వరుస పరిణామాల నేపథ్యంలో మౌనిక-మనోజ్ ల వివాహం ఖాయమే అన్న వాదన మొదలైంది.

తాజాగా మంచు మ‌నోజ్ మరో రెండు రోజుల్లో తన జీవితానికి సంబంధించిన ఓ ప్రత్యేకమైన వార్తను అందరితో పంచుకుంటానని అంటున్నాడు. తన మొదటి చిత్రం ‘దొంగ దొంగది’లోని ‘మన్మథ రాజా’ పాటకు సంబంధించిన జిఫ్‌ వీడియోను షేర్‌ చేస్తూ.. ‘నా హృదయానికి హత్తుకునే ఓ ప్రత్యేకమైన వార్తను గత కొంతకాలంగా నాలోనే దాచుకున్నా. జీవితంలోని మరో దశలోకి అడుగు పెట్టేందుకు ఎంతో ఆతృతగా ఉన్నాను. దీనికి సంబంధించిన వివరాలను జనవరి 20న ప్రకటిస్తా. ఎప్పటిలానే మీ అందరి ఆశీస్సులు కావాలి’ అని మ‌నోజ్ త‌న ట్వీట్‌లో రాసుకురాగా, ఈ ట్వీట్ వైర‌ల్ అవుతుంది.

మంచు మనోజ్ 2004లో ‘దొంగ దొంగది’ మూవీ ద్వారా టాలీవుడ్‌లో అడుగుపెట్ట‌గా, ఆ తర్వాత ‘శ్రీ’, ‘రాజుభాయ్’, ‘నేను మీకు తెలుసా’ వంటి భిన్నమైన సినిమాలతో ప్రేక్షకుల ముందుకు వచ్చాడు. అయితే, ఆ సినిమాలు ఆశించిన విజయం సాధించలేదు. 2018లో ‘అపరేషన్ 2019’ మూవీ తర్వాత మళ్లీ మనోజ్ సినిమాలకు సైన్ చేయలేదు. 2015లో తన గర్ల్‌ఫ్రెండ్ ప్రణతి రెడ్డిని వివాహం చేసుకున్న మనోజ్.. 2019లో విడాకులు తీసుకున్నాడు. అప్పటి నుంచి మనోజ్ ఒంటరిగానే ఉంటున్నారు. ఇక త్వరలో రెండో పెళ్లి చేసుకోబోతున్నారంని, భూమా మౌనిక రెడ్డితో మంచు మనోజ్‌ ఏడడుగులు వేయడం ఖాయం అని అభిమానులు భావిస్తున్నారు.