Indian T20 World Cup Squad 2024 : ఈ జ‌ట్టుతో మ‌నం టీ20 వ‌ర‌ల్డ్ క‌ప్ కొట్ట‌గ‌ల‌మా..?

Indian T20 World Cup Squad 2024 : మరో నెల రోజుల్లో టీ20 వరల్డ్ కప్ ప్రారంభం కానున్న విష‌యం తెలిసిందే. ఇక ఒక్కో దేశం త‌మ ఆట‌గాళ్లకి సంబంధించిన లిస్ట్ విడుద‌ల చేస్తుంది.. ఈ మెగా టోర్నీలో పాల్గొనే భారత జట్టును బీసీసీఐ మంగళవారం ప్రకటించింది. రోహిత్ శర్మ సారథ్యంలో 15 మందితో కూడిన జట్టును వెల్లడించింది. రింకూ సింగ్, కేఎల్ రాహుల్‌కు మొండిచేయి చూపడం మినహా అంచనాలకు తగ్గట్లుగానే జట్టును ఎంపిక చేసింది. రోహిత్ శర్మ, విరాట్ కోహ్లి, యశస్వీ జైస్వాల్‌, సూర్య కుమార్ యాదవ్ టాప్ ఆర్డర్ బ్యాటర్లుగా ఎంపిక అయ్యారు. రిషభ్ పంత్ మెగాటోర్నీతో అంతర్జాతీయ క్రికెట్‌లో రీఎంట్రీ ఇవ్వనున్నాడు. పంత్, హార్దిక్ పాండ్య, శివమ్ దూబె, సంజు శాంసన్ మిడిలార్డర్‌లో చోటు దక్కించుకున్నారు.

జట్టులో స్థానాలకు తగ్గట్లుగా కాకుండా స్టార్ ప్లేయర్లను సెలక్ట్ చేయడంతో మిడిల్ ఆర్డర్-లోయర్ ఆర్డర్ కూర్పు గందరగోళంగా మారింది. అలాగే ఫామ్‌లో లేని మహ్మద్ సిరాజ్, అర్షదీప్ సింగ్‌లను ఎంపిక చేయడంతో భారత పేస్ దళం బలహీనంగా కనిపిస్తోంది. ఐపీఎల్‌లో సిరాజ్, అర్షదీప్ ధారాళంగా పరుగులు ఇస్తున్న విషయం తెలిసిందే. ఇక ఐపీఎల్‌లో, అంతకుముందు జరిగిన అఫ్గానిస్థాన్ సిరీస్‌లో దూబె నాలుగో స్థానంలో వచ్చాడు. భారత జట్టులో అయిదో స్థానం వరకు ఖరారు అవ్వడంతో దూబె ఆరు లేదా ఏడో స్థానాల్లోనే రావ‌ల్సి ఉంటుంది. ఆ స్థానంలో పెద్ద‌గా ఆడింది లేదు. అయితే ఫినిషర్ పాత్రలో దూబె ఎంతమేరకు రాణిస్తాడు? అన్న‌ది ప్ర‌శ్నార్ధ‌కంగా మారింది.

ఆ స్థానాల్లో రింకూ సింగ్‌కు మంచి రికార్డు ఉంది. కానీ అతడు జట్టులో లేడు. ఫామ్‌లో ఉన్న దూబెను జట్టులో బలవంతంగా కొనసాగించాలని భావిస్తే భారత జట్టు కూర్పు చెడిపోతుందని క్రికెట్ విశ్లేషకులు భావిస్తున్నారు. ఏడో స్థానంలో బ్యాటింగ్ చేయడం హార్దిక్‌కు అలవాటే. అయితే స్పిన్ ఆల్‌రౌండర్‌గా జడేజా/ అక్షర్ పటేల్‌లో ఒకరు తుది జట్టులోకి వస్తారు. దీంతో అయిదో స్థానం నుంచి ఎనిమిదో స్థానం వరకు భారత్ పంత్, దూబె, జడేజా/అక్షర్ పటేల్ వంటి ముగ్గురు ఎడమ చేతి వాటం బ్యాటర్లతో బరిలోకి దిగాల్సి వస్తుంది. మ‌రి ఇది ఎంత వ‌ర‌కు స‌క్సెస్ అవుతుంద‌నేది చూడాల్సి ఉంది.