Rains : తెలంగాణ‌కి రెడ్ అల‌ర్ట్.. రానున్న మూడు రోజుల‌లో భారీ నుండి అతి భారీ వ‌ర్షాలు..

Rains : గ‌త నెల‌లో ఉక్క‌పోత‌తో ఉడికిపోయిన ప్ర‌జ‌ల‌కి వ‌ర్షాలు ఉప‌శ‌మ‌నం క‌లిగిస్తున్నాయి. అయితే గ‌త వారం రోజులుగా తెలంగాణలోని పలు జిల్లాల్లో భారీ వర్షాలు కురుస్తున్నాయి. దీంతో ప్రాజెక్టులకు వరద పోటెత్తుతోంది. ఈ నేపథ్యంలో వాతావరణ శాఖ తెలంగాణలో రెడ్ అలర్ట్ ప్రకటించింది. వచ్చే మూడు రోజుల్లో రాష్ట్రంలో భారీ నుంచి అతిభారీ వర్షాలు కురుస్తాయని తెలిపింది. ఇప్పటికే ఆరెంజ్ అలర్ట్ జారీ చేసిన వాతావరణ శాఖ.. తాజాగా రెడ్ అలర్ట్ ప్రకటించింది.25, 26, 27 తేదీల్లో రాష్ట్రంలో పలు ప్రాంతాల్లో భారీ నుంచి అత్యంత భారీ వర్షాలు కురిసే అవకాశం ఉందని హెచ్చరించింది.

రాష్ట్రవ్యాప్తంగా ఉరుములు, మెరుపులు, ఈదురుగాలులు వీచే అవకాశం ఉందని చెప్పింది. గంటకు 40 నుంచి 50 కిలోమీటర్ల వేగంతో గాలులు వీస్తాయని వాతావరణ శాఖ తెలిపింది. బంగాళాఖాతంలో ఏర్పడిన అల్పపీడనం కారణంగా వాతావరణం పూర్తిగా మారిపోయింది. ఏకకాలంలో ఏపీ, తెలంగాణ రాష్ట్రాలకు భారీ నుంచి అతి భారీ వర్షాలు హెచ్చరిక జారీ అయింది.ఈ క్ర‌మంలో వచ్చే నాలుగు రోజులు చాలా జాగ్రత్తగా ఉండాలని హైదరాబాద్ వాతావరణ కేంద్రం సూచిస్తోంది. బంగాళాఖాతంలో ఇవాళ అల్పపీడనం ఏర్పడనుండటంతో పాటు ఉపరితల ఆవర్తనం ఇప్పటికే ఆవహించి ఉండటం, మ‌రోవైపు నైరుతి రుతు పవనాలు బలపడటంతో వ‌ర్షాలు భారీగా కురుస్తున్నాయి.

తెలంగాణలో వచ్చే నాలుగు రోజులు భారీ వర్షాలు పడనున్నాయని వాతావరణ శాఖ ముందస్తు హెచ్చ‌రిక జారీ చేసింది. దక్షిణ ఒడిశా, ఉత్తరాంధ్రలోని వాయువ్య బంగాళాఖాతం, పశ్చిమ బంగాళాఖాతంలో ఏర్పడుతున్న అల్పపీడనం జూలై 26 నాటికి వాయుగుండంగా మారనుంది. ఫలితంగా ఇవాళ్టి నుంచి వరుసగా నాలుగు రోజులపాటు భారీ నుంచి అతి భారీ వర్షాలు పడనున్న‌ట్టు వాతావ‌ర‌ణ శాఖ హెచ్చరించింది.. రేపు హైదరాబాద్ నగరంలో ఆరెంజ్ అలర్ట్ జారీ అయింది. సోమవారం నాడు సాయంత్రం నుంచి హైదరాబాద్‌లోని పలు ప్రాంతాల్లో భారీ వర్షం కురిసింది. జూబ్లీహిల్స్, బంజారాహిల్స్, ఫిల్మ్‌నగర్, హైటెక్ సిటీ, గచ్చిబౌలి, యూసఫ్‌గూడ, అమీర్‌పేట్, వెంకటగిరి ప్రాంతాలతో పాటు నగరంలోని పలు ప్రాంతాల్లో వర్షం మొదలైంది. వర్షం కారణంగా పంజాగుట్ట నిమ్స్ దగ్గర, జూబ్లీహిల్స్, బంజారాహిల్స్‌లో ట్రాఫిక్‌కు తీవ్ర అంతరాయం ఏర్పడింది. ముసురు కారణంగా జంట జలాశయాలకు భారీగా వరద నీరు చేరింది. హిమాయత్‌సాగర్‌ నాలుగు గేట్లను రెండు అడుగుల మేర ఎత్తి 2750 క్యూసెక్కుల నీటిని మూసీలోకి విడుదల చేశారు.