RRR : టాలీవుడ్‌లో ఈ మధ్య కాలంలో మ‌ల్టీ స్టార‌ర్ చిత్రంగా వచ్చి దేశ వ్యాప్తంగా సంచలనం సృష్టించిన చిత్రం ఆర్ఆర్ఆర్ (రౌద్రం రణం రుధిరం). దర్శకధీరుడు రాజమౌళి రూపొందించిన ఈ సినిమాలో టాలీవుడ్‌ను ఏలుతోన్న ఇద్దరు స్టార్ హీరోలు యంగ్ టైగర్ జూనియర్ ఎన్టీఆర్, మెగా పవర్ స్టార్ రామ్ చరణ్ ప్ర‌ధాన పాత్ర‌లు పోషించారు. ఈ చిత్రం ఇప్పటికే ఎన్నో అవార్డులను గెలుచుకుని ఆస్కార్ బ‌రిలోను నిలిచింది. ఓటీటీలోను ఈ మూవీ సత్తా చాటింది. నెట్‌ఫ్లిక్స్‌లో ఎక్కువ మంది వీక్షించిన నాన్ ఇంగ్లీష్ సినిమాల్లో ఆర్ఆర్ఆర్ (రౌద్రం రణం రుధిరం) మూవీ టాప్‌ ప్లేస్‌కు చేరుకుంది.
ఏకంగా 15 వారాల పాటు ట్రెండింగ్‌లో ఉన్న ఈ చిత్రం వరల్డ్ రికార్డును కూడా క్రియేట్ చేసుకుంది. అంతేకాదు, గతంలో ఇండియా తరపున ఈ మైలురాయిని అందుకున్న చిత్రంగా నిలిచింది. అలాగే, ఎక్కువ వ్యూస్‌తోనూ సత్తా చాటుకుంది ట్రిపుల్ ఆర్ చిత్రం. ఇక ఈ మూవీపై ఇంకా ప్రశంసల వ‌ర్షం కురుస్తూనే ఉంది. తాజాగా ‘గేమ్ ఆఫ్ థ్రోన్స్ లో మిస్సాండే పాత్ర పోషించి ప్రజాదరణ పొందిన ఆంగ్ల నటి నథాలీ ఇమ్మాన్యుయేల్, ‘ఆర్ఆర్ఆర్’ చిత్రాన్ని ‘ఎ సిక్ మూవీ’ అని కామెంట్ చేసింది. అనంతరం కళాకారులు మరియు ఇత‌ర సిబ్బందిని ప్రశంసిస్తూ తన పోస్ట్ పెట్టింది.
నాటు నాటు సాంగ్‌తో పాటు అలియా భ‌ట్ పాత్ర‌ని ఆమె ప్ర‌శంసించింది. సిక్ అంటే గ్రేట్ అంటూ కూడా క్లారిటీ ఇచ్చింది. ఎన్టీఆర్, రామ్ చరణ్ డ్యాన్స్‌కి ముగ్ధురాలైన‌ట్టు కూడా పేర్కొంది. గతంలో కూడా ప‌లువురు హాలీవుడ్ ప్ర‌ముఖులు ఆర్ఆర్ఆర్ చిత్రంపై ప్రశంసల వ‌ర్షం కురిపించిన విష‌యం తెలిసిందే. ఈ మూవీ ఇప్పటికే ఎన్నో నేషనల్ అండ్ ఇంటర్నేషనల్ అవార్డులను సొంతం చేసుకుంది. అలాగే, ఒరిజినల్ సాంగ్ విభాగంలో ఆస్కార్ నామినేషన్స్‌లో షార్ట్ లిస్టులో కూడా చోటు దక్కించుకుంది. అలాంటిది నెట్‌ఫ్లిక్స్ మూవీస్ జాబితాలో చోటు లేకపోవడం చాలా మందిని షాక్ గురి చేస్తోంది.
