Srihari : ఇండస్ట్రీకి రాకముందు రియల్ స్టార్ శ్రీహరి చేసిన పనిని చూస్తే అందరూ సలాం చేస్తారు..

Srihari : తెలుగు చలనచిత్ర పరిశ్రమంలో ఎప్పటికీ మర్చిపోలేని నటులు కొందరు ఉంటారు. ఈ జనరేషన్ లో అలాంటి అరుదైన నటుడు రియల్ స్టార్ శ్రీహరి. ఆయన మనకు దూరమై దాదాపు 9 సంవత్సరాలు అవుతున్న ఇప్పటికీ అతని మర్చిపోలేకపోతున్నారు అభిమానులు. ఎన్ని సినిమాలు చేశామనేది కాదు.. ఎలాంటి సినిమాలు చేశాం అనేలా ప్రేక్షకుల మదిలో ముద్ర వేసుకున్నారు రియల్ స్టార్. తనదైన అద్భుతమైన నటనతో యాక్షన్, ఫ్యామిలీ ఆడియన్స్ కు బాగా దగ్గరయ్యారు ఈయన. శ్రీహరి ఇండస్ట్రీకి రాకముందు ఎన్ని కష్టాలు పడ్డాడో తెలిస్తే కన్నీరు ఆగవు..

రియల్ స్టార్ శ్రీహరిని చూస్తే అంతా తెలంగాణ ప్రాంతం వాడు అని అనుకుంటారు. కానీ ఆయన సొంత ఊరు ఇది కాదు ఆంధ్రప్రదేశ్ లోని కృష్ణా జిల్లాలోని ఓ పేద కుటుంబంలో 1964 ఆగస్టు 15న శ్రీహ‌రి జ‌న్మించాడు. అయితే ఆయనకు ఊహ తెలియ‌క‌ ముందే కుటుంబం హైద‌రాబాద్ కు వ‌ల‌స వ‌చ్చింది. హైద‌రాబాద్ లో శ్రీహ‌రి కుటుంబం పాల బిజినెస్ చేసే వాళ్ళు. అలాగే వాళ్లకు ఒక చిన్న మెకానిక్ షెడ్ కూడా ఉండేది. ఉండటానికి సొంత ఇల్లు కూడా లేని సమయంలో వర్షం పడుతున్నప్పుడు ముగ్గురు అన్నదమ్ములు అదే మెకానిక్ షెడ్డులో తలదాచుకునే వాళ్ళు. చినుకులు వస్తున్నా కూడా.. అలాగే తడుస్తూ పడుకున్న సందర్భాలు ఎన్నో ఉన్నాయని అప్పట్లో శ్రీహరి చెప్పేవాడు. చిన్నప్పటి నుంచి శ్రీహ‌రికి బ్రూస్ లీ సినిమాలు అంటే చెప్ప‌లేనంత ఇష్టం. ఆ ఇష్టంతోనే ఆయన జిమ్నాస్టిక్ లో శిక్షణ తీసుకొని జాతీయ స్థాయి వరకు వెళ్ళాడు. ఆ తర్వాత సినిమాల్లోకి ఎంట్రీ ఇచ్చి నటుడు కావాలి అనుకున్నాడు.

సినిమా ఇండ‌స్ట్రీలో అవ‌కాశాల కోసం ప్ర‌య‌త్నాలు జ‌రుపుతున్న స‌మ‌యంలో దాస‌రి గుర్తించి బ్ర‌హ్మ‌నాయుడు సినిమాలో అవ‌కాశం ఇచ్చారు. తన మొహానికి మొదటిసారి రంగు వేసి బొట్టు పెట్టి ఇండస్ట్రీకి ఆహ్వానించింది దాసరి నారాయణరావు.. నా గురువు అంటూ చనిపోయే వరకు గర్వంగా చెప్పుకున్నాడు శ్రీహరి. బ్రహ్మనాయుడు సినిమా విజయం సాధించక పోయినా కూడా ఆ తర్వాత శ్రీహరికి కొన్ని సినిమాలలో అవకాశాలు వచ్చాయి. సాధారణంగా హీరోలు కొడితే విలన్లు కింద పడిపోతారు.. కానీ శ్రీహరి మాత్రం రొటీన్ గా ఉండడం ఎందుకు అని విలనిజంలో కూడా కొత్త కొత్తగా ప్రయత్నించాడు. అదే ఆయనకు ఇతర ప్రతి నాయకులనుంచి వేరు చేసి చూపించింది. రౌడీ ఇన్స్పెక్ట‌ర్, తాజ్ మ‌హ‌ల్ సినిమాల్లో యంగ్ విల‌న్ రోల్స్ చేసి శ‌భాష్ అనిపించుకున్నారు.

పోలీస్ సినిమాతో హీరో అయిన ఆ తర్వాత వరుసగా సాంబయ్య, దేవా, భద్రాచలం లాంటి సినిమాలతో మంచి విజయాలు అందుకున్నాడు. నువ్వొస్తానంటే నేనొద్దంటానా సినిమాతో ఒక మంచి అన్నగా తెలుగు ఇండస్ట్రీలో తిరుగులేని గుర్తింపు సంపాదించుకున్నాడు. మగధీర లాంటి సినిమాలలో శ్రీహరి నటన ఎప్పటికీ అజరామరం. కెరీర్ పాన్ ఇండియా స్థాయికి వెళుతున్న సమయంలో కేవలం 49 సంవత్సరాల వయసులో కాలేయ సంబంధిత వ్యాధితో 2013 అక్టోబర్ 9న మరణించాడు శ్రీహరి. ఈయన మరణంలో కూడా మిస్టరీ ఉందని.. డాక్టర్లు చేసిన తప్పిదం వల్లే తన భర్త చనిపోయాడు అంటూ శ్రీహరి భార్య శాంతి ఆరోపించడం అప్పట్లో సంచలనంగా మారింది.