Avatar 2 : సినీ చరిత్రలోనే భారీ బడ్జెట్‌తో రూపొందిన విజువల్ వండర్ మూవీ ‘అవతార్ ది వే ఆఫ్ వాటర్’ గత రికార్డులను బద్దలు కొడుతూ ప్రపంచ వ్యాప్తంగా అత్యధికంగా బిజినెస్‌ను జరుపుకున్న విష‌యం తెలిసిందే . ప్రపంచ వ్యాప్తంగా ఈ చిత్రం డిసెంబర్ 22వ తేదీన ఎక్కువ థియేటర్లలో విడుదలైంది. అందుకు తగ్గట్లుగానే ఈ చిత్రానికి అన్ని వర్గాల ప్రేక్షకుల నుంచి భారీ స్థాయిలో స్పందన దక్కింది. ఫుల్ ర‌న్‌లో ఈ మూవీ రెండు బిలియన్ డాలర్లు అంటే ఇండియన్ కరెన్సీలో రూ. 16423 కోట్లకు పైగా వసూళ్లను రాబట్టింది. ఈ సినిమాలోని గ్రాఫిక్స్‌కు ప్రేక్షకులు నోరెళ్లబెట్టారు. ఈ సినిమాను ఖచ్చితంగా ఒక్కసారైనా చూడాల్సిందే అంటూ థియేటర్లలో ఈ సినిమాకు మంచి రెస్పాన్స్ అందించారు ప్రేక్షకులు.
అవతార్ 2 సినిమా ఆస్కార్ బరిలో పలు విభాగాల్లో నామినేట్ కావడంతో, ఇప్పుడు అందరి చూపు ఈ సినిమాకు ఎన్ని అవార్డులు దక్కుతాయా అనే అంశంపై ప‌డింది. ఇక ఓటీటీలో వ‌స్తే ఈ సినిమా చూడాల‌ని త‌హ‌త‌హ‌లాడుతున్న ప్రేక్షకులకి చిత్ర బృందం గుడ్ న్యూస్ చెప్పింది. ఈ సినిమాను మార్చి 28వ తేదీ నుంచి డిజిటల్ స్ట్రీమింగ్ చేస్తున్నట్లు ప్రకటించింది. ఇక, ఈ సినిమా ఓటీటీ హక్కులను డిస్నీ ప్లస్ హాట్‌స్టార్‌ సంస్థ దక్కించుకుంది. ఇందులో భాగంగా మార్చి 28 నుంచి స్ట్రీమింగ్ కాబోతుంది. థియేట‌ర్ లో ర‌చ్చ లేపిన ఈ సినిమా ఓటీటీలో ఎంత పెద్ద హిట్ అవుతుందా అని ఆస‌క్తిగా చూస్తున్నారు.
ఇక హాలీవుడ్ దిగ్గజ దర్శకుడు జేమ్స్ కామెరాన్ తెరకెక్కించిన అద్భుత దృశ్యకావ్యమే ‘అవతార్ ది వే ఆఫ్ వాటర్’. మొదటి భాగంలో నటించిన వాళ్లతోనే ఈ సినిమాను కూడా తెరకెక్కించారు. విజువల్ వండర్‌గా దాదాపు 350 – 400 మిలియన్ డాలర్లకు పైగా బడ్జెట్‌తో ఈ సినిమా రూపొందింది. ఇందులోని గ్రాఫిక్స్ ప్రేక్షకులకి క‌నుల పండుగ‌గా నిలిచాయి.
