Anushka Shetty : పూరీ జ‌గ‌న్నాథ్‌ని మోసం చేశాను అని ఓపెన్‌గా చెప్పేసిన అనుష్క‌

Anushka Shetty : హీరోలకి స‌మానంగా ఫ్యాన్ ఫాలోయింగ్ పెంచుకున్న అందాల ముద్దుగుమ్మ అనుష్క‌. టాలీవుడ్ జేజమ్మగా పేరు తెచ్చుకుని అంద‌రి మ‌న‌సుల‌లో చెర‌గ‌ని ముద్ర వేసుకుంది. తెలుగులో లేడీ ఓరియంటెడ్ సినిమాలకు పునాది వేసింది అనుష్క‌నే అని చెప్ప‌డంలో ఎలాంటి అతిశ‌యోక్తి లేదు. ఇండస్ట్రీలో స్టార్ హీరోయిన్ గా చాలా కాలం పాటు వెలుగు వెలిగింది. రీసెంట్ గా ‘మిస్ శెట్టి మిస్టర్ పోలిశెట్టి’ సినిమాతో రీ ఎంట్రీ ఇచ్చి మంచి సక్సెస్ అందుకుంది. తాజాగా సోషల్ మీడియాలో అనుష్కకు సంబంధించిన పాత ఇంటర్వ్యూ వీడియో వైరల్ గా మారింది. ఆ వీడియోలో అనుష్క తనకు హీరోయిన్ గా ఫస్ట్ ఛాన్స్ ఎలా వచ్చింది? పూరి జగన్నాథ్, నాగార్జున తనను ఎలా సపోర్ట్ చేశారు? అనే అంశాల గురించి చెప్పుకొచ్చింది.

హీరోయిన్ కాక‌ముందే అనుష్క యోగా టీచ‌ర్‌గా చేసింద‌నే విష‌యం అంద‌రికి తెలిసిందే. అయితే ఈ ఇంట‌ర్వ్యూలో మాట్లాడుతూ.. యోగ టీచర్ గా ఆరు సంవత్సరాలు పనిచేశానని, యోగ మీద ఉన్న ప్యాషన్ తోనే పనిచేశాను తప్ప డబ్బు కోసం కాదని, నా జీవితంలో నేను ఎప్పుడూ డబ్బుకి ప్రయారిటీ ఇవ్వలేదని పేర్కొంది. మీకు హీరోయిన్‌గా ఫస్ట్ ఛాన్స్ ఎలా వచ్చింది? అని అడగగా.. “పూరి జగన్నాథ్ వల్ల వచ్చింది. ఇండస్ట్రీ పర్సన్ అయిన నివాస్ వైఫ్, నేను మంచి యోగా ఫ్రెండ్స్. నివాస్ తో పాటు శ్రీను అని ఉండేవారు. ఆయన పూరి జగన్నాథ్ ని కలవమని చెప్పారు. ఒక సినిమా కోసం హీరోయిన్ ని వెతుకుతున్నారు అని చెప్పి ఫోన్ చేయమని నాతో అన్నారు.

కానీ నాకు చాలా సిగ్గు. శీను నాకు కాల్ చేయమని అన్నారు. కానీ నేను ఆ విషయంలో పూరి జగన్నాథ్ ని చీటింగ్ చేశాను. ఎందుకంటే నేను కాల్ చేయలేదు. ఆ సమయంలో శ్రీను కాల్ చేసావా? అని అడిగితే చేశాను అని చెప్పాను. నెక్స్ట్ టైం వచ్చినప్పుడు వాళ్ళందరూ నేను తప్పించుకుంటున్నానని అర్థం చేసుకొని వాళ్లే.. నన్ను పూరి జగన్నాథ్ తో కాల్ చేయించారు అని పేర్కొంది. నిజం చెప్పాలంటే నేను సినిమాలు పెద్దగా చూడను. టీవీ కానీ, మూవీస్ కానీ అలవాటు లేవు. అప్పుడు పూరి జగన్నాథ్ ని కలిశాను. సో ఒక మూవీ ఉందని చెప్పారు.

అప్పుడు ఫోటో ఉందా? అని అడిగారు. దాంతో ఉందని, నా పాస్ పోర్ట్ సైజ్ ఫోటో తీసి ఇచ్చాను. అప్పుడు పూరి ఆ ఫోటో చూసి ఆ తర్వాత నా ఫేస్ చూసి నవ్వారు. ఆ తర్వాత సరే నేను కాల్ చేస్తాను అని చెప్పి వెళ్లిపోయారు. నెక్స్ట్ డే కాల్ చేసి నువ్వు హైదరాబాద్ రావాలి అని అన్నారు. ఆ టైంలో నాకు యోగ క్లాసెస్ ఉండ‌డంతో శ‌నివారం వ‌స్తాను అని చెప్పాను. శుక్ర‌వారం కాల్ చేస్తే వెళ్లాను. లుక్ టెస్ట్ చేశారు. ఆ టైంలో నాతో పాటు ఇంకో హీరోయిన్ కూడా వచ్చింది టెస్ట్ అయ్యాక ఫోటో షూట్ కూడా చేశారు. ఇవన్నీ చూసి మన వల్ల కాదని వెళ్లిపోవాలని అనుకున్నాను. కానీ ఆ తర్వాత నాగార్జున నన్ను చూసి ఈ అమ్మాయిలో ఏదో ఉంది అని నన్ను సెలెక్ట్ చేశారు” అని పేర్కొంది.