Ambati Rambabu : అసెంబ్లీలో మీసం తిప్పిన బాల‌కృష్ణ‌.. స్ట్రాంగ్ కౌంట‌ర్ ఇచ్చిన అంబ‌టి..

Ambati Rambabu : ఏపీ అసెంబ్లీ రణరంగాన్ని తలపించింది. వర్షాకాల సమావేశాల తొలిరోజే టీడీపీ, వైసీపీ సభ్యులు తీవ్ర వాగ్వాదానికి దిగారు. సభలో మీసాలు మెలేస్తూ, తొడలు కొట్టుకుని వార్నింగ్ లు ఇచ్చుకున్నారు. చంద్రబాబు అరెస్ట్ పై చర్చించాలని టీడీపీ ఎమ్మెల్యేలు పట్టుబట్ట‌డంతో… బీఏసీలో చర్చించి నిర్ణయం తీసుకుంటామని మంత్రి బుగ్గన అన్నారు. అయినా టీడీపీ ఎమ్మెల్యేలు స్పీకర్ పోడియం వద్దకు వెళ్లి ప్లకార్డులు ప్రదర్శించి ఆందోళన చేశారు. ఈ క్రమంలో టీడీపీ, వైసీపీ ఎమ్మెల్యేల మధ్య తీవ్ర వాగ్వాదం జరిగింది. ముఖ్యంగా టీడీపీ ఎమ్మెల్యే బాలకృష్ణ, మంత్రి అంబటి రాంబాబు మధ్య మాటల యుద్ధం జరిగింది. ఒకరికొకరు అసెంబ్లీ వేదికగా సవాళ్లు విసురుకున్నారు. అసెంబ్లీలో బాలయ్య మీసం మెలితిప్పి సవాల్ చేయగా, మీసాలు తిప్పడాలు సినిమాల్లో చూపించుకోవాలంటూ బాలకృష్ణకు మంత్రి అంబటి కౌంటర్‌ ఇచ్చారు.

యంతృత్వ ధోరణిలో సభ జరిగిందని హిందూపురం ఎమ్మెల్యే బాలకృష్ణ అన్నారు. చంద్రబాబుపై కేసు పెట్టడం దారుణమన్నారు. కక్ష సాధింపు వైఖరే సీఎం జగన్ పాలన అని పేర్కొన్నారు. ఎమ్మెల్యేలకు, ప్రతిపక్ష నేతకు, ప్రజలకు భద్రత లేదన్నారు. అంబటి రాంబాబు అసెంబ్లీలో రెచ్చగొడుతున్నారని చెప్పారు. అంబటి సభను తప్పుదారి పట్టించారన్నారు బాలకృష్ణ. దీనికి అంబ‌టి రాంబాబు మాట్లాడుతూ.. మీరు సినిమాల్లో మీసం తిప్పండి ఇక్కడ కాదు..మాకు ఉన్నాయి మీసాలు, మీము కూడా తిప్పుతాం అంటూ రాంబాబు ఘాటుగా స్పందించారు. ఈ క్రమంలో బాలయ్య హెచ్చరించడంతో దమ్ముంటే రా అంటూ అంబటి రాంబాబు సవాల్‌ విసిరారు.

అసెంబ్లీలో జరిగిన ఘటనలు తలుచుకుంటే బాధేస్తోందని బాలకృష్ణ అన్నారు. వైసీపీ ప్రభుత్వం నియంతృత్వ ధోరణిలో శాసనసభను నడిపిస్తోందని ఆరోపించారు. చంద్రబాబును ఆధారాలు లేని కేసులో జైలుకు పంపారన్నారు. వైసీపీ ఎమ్మెల్యేలు సభలో తెలుగు సినిమా కళాకారులను అత్యంత ఘోరంగా అవమానించారని చెప్పారు. సినీ రంగం నుంచి వచ్చిన ఎన్టీఆర్ ముఖ్యమంత్రి అయ్యి… ఎందరికో రాజకీయ భిక్ష పెట్టారని బాలకృష్ణ గుర్తుచేశారు. ఇవాళ సభలో తనకు మాత్రమే అవమానం జరగలేదని, మొత్తం తెలుగు సినీ పరిశ్రమను కించపరిచారన్నారు. అసెంబ్లీలో ముందుగా మీసం మెలేసి, తొడకొట్టి సవాల్ చేసింది వైసీపీ ఎమ్మెల్యేలే అని బాలకృష్ణ అన్నారు.