The Legend : రిటైల్ పరిశ్రమలో ప్రసిద్ధ వ్యాపారవేత్త, లెజెండ్ శరవణన్ గత సంవత్సరం పాన్ ఇండియన్ చిత్రం ది లెజెండ్‌తో సినీ రంగ ప్ర‌వేశం చేసిన విష‌యం తెలిసిందే. కోట్లాది రూపాయల భారీ బడ్జెట్ తో హరీష్ జైరాజ్ లాంటి టెక్నికల్ టీమ్ తో డబ్బు మంచి నీళ్లలా ఖర్చు పెట్టి మరీ ఈ సినిమా తీశారు. సుమారు డెబ్భై కోట్లకు పైగానే బడ్జెట్ అయ్యిందని ప్ర‌చారం జ‌రిగింది. ఈ సినిమాకి పెట్టిన లాభాలు కాదు, క‌నీసం పెట్టిన రూపాయి కూడా వెనక్కి రాలేదు.. అయినా శరవణన్ మ‌ళ్లీ మరో సినిమా చేసేందుకు సిద్ధ‌మ‌వుతున్నాడు. అయితే శరవణన్ న‌టించిన ది లెజెండ్ సినిమా రిలీజ్ కు ముందే వచ్చిన వీడియో సాంగ్స్ మీద బోలెడు మీమ్స్ హ‌ల్‌చ‌ల్ చేశాయి.
రవితేజ రామారావు ఆన్ డ్యూటీ, సుదీప్ విక్రాంత్ రోనాలతో పోటీగా సినిమాని రిలీజ్ చేశాడు శరవణన్. సినిమాలో హీరో తెరపై చేసే విన్యాసాలు చూసి జనం నవ్వుకున్నారు. దాంతో హీరో శరవణన్ సోషల్ మీడియాలో ట్రోలింగ్ మెటీరియల్ అయిపోయాడు. ఇప్పుడీ చిత్రం ఓటిటిలో వస్తోంది. మార్చి3 నుంచి అంటే ఈ రోజు నుంచి హాట్ స్టార్ ఓటిటిలో చూడచ్చు అన్నమాట.ఇక ఇప్పుడు మరింత ట్రోల్స్ పెరిగిపోతాయని అందరూ భావిస్తున్నారు. డిస్నీ ప్లస్ హాట్‌స్టార్‌లో తమిళం, తెలుగు, హిందీ మరియు మలయాళ భాషలలో ప్రసారం చేయడానికి అందుబాటులో ఉంటుంది.
ఈ విషయాన్ని లెజెండ్ శరవణన్ స్వయంగా ప్రకటించారు. ఈ చిత్రంలో గీతిక తివారీ మరో కథానాయికగా నటించింది. నాజర్, సుమన్, ప్రభు, విజయకుమార్, లత, దేవదర్శిని, మునిష్కాంత్ ఇతర కీలక పాత్రలు పోషించారు. రజినీకాంత్ శివాజీ కథను తిప్పి ఈ సినిమా కథ రాయ‌గా, ఇందులో శివాజిలోని విలన్ సుమన్ నే దీనికే తీసుకొచ్చి ఓ పిల్లి గెడ్డం పెట్టి మేనేజ్ చేసే ప్రయత్నం చేసాడు. ఓ ప్రాణాంతక వ్యాధికి మందు కనిపెట్టిన డాక్టర్ శరవణన్ ఎలాగైనా దాన్ని పేదలకు అందజేయాలనే లక్ష్యం పెట్టుకోగా, ఆ స‌మ‌యంలో ఎన్నో ఇబ్బందులు ఎదురవుతాయి. వాటిని దాటుకొని ఎలా బ‌య‌ట‌ప‌డ్డాడ‌నేది సినిమా కథ.
