కుమార్తెకు ప్రేమ వివాహం జ‌రిపించిన ప్రొద్దుటూరు ఎమ్మెల్యే

ఈ రోజుల్లో ప్రేమ పెళ్లిళ్ల విష‌యంలో త‌ల్లిదండ్రులు సంచ‌ల‌న నిర్ణ‌యాలు తీసుకుంటున్న విష‌యం తెలిసిందే. న‌చ్చ‌ని పెళ్లి చేసుకుంటున్నార‌నే నెపంతో ప్రేమించిన అబ్బాయిని లేదంటే త‌న కూతురిని చంపించ‌డానికి కూడా ఏమాత్రం ఆలోచించ‌డం లేదు. కాని ప్రొద్దుటూరు ఎమ్మెల్యే త‌న కూతురు ప్రేమించిన వ్య‌క్తితో వివాహం జ‌రిపించి అంద‌రిని ఆశ్చ‌ర్య‌ప‌రిచాడు. సాధార‌ణంగా రాజ‌కీయ నాయ‌కులు త‌మ‌ పలుకుబడిని చూపిస్తూ పెళ్లి ఆపేందుకు ప్ర‌య‌త్నిస్తారు. కానీ ఈ ఎమ్మెల్యే తన కూతురు వివాహాన్ని నిరడంబరంగా సబ్ రిజిస్టర్ కార్యాలయంలో చేసి తన ఔన్నత్యాన్ని చాటుకున్నారు. కడప జిల్లా పొద్దుటూరు నియోజకవర్గం వైసీపీ ఎమ్మెల్యే రాచమల్లు శివప్రసాద్ రెడ్డి తన కుమార్తె వివాహాన్ని చాలా నిరాడంబరంగా చాలా సాంప్రదాయ బద్ధంగా నిర్వహించారు.

ప్రొద్దుటూరు సబ్ రిజిస్టర్ కార్యాలయంలో రిజిస్టర్ వివాహం చేసి కన్న కూతురుపై తనకున్న ప్రేమను చాటుకున్నారు. గురువారం ఉదయం 11 గంటల సమయంలో సబ్ రిజిస్టర్ కార్యాలయానికి తన కూతురు పల్లవితో వచ్చిన ఎమ్మెల్యే రాచమల్లు శివప్రసాద్ రెడ్డి వారిద్దరికీ వివాహాన్ని జరిపించారు. కే లీలా గోపీ పవన్ కుమార్‌తో తన మొదటి కుమార్తె రాచమల్లు పల్లవి పెళ్లి చేశారు. అంతకముందు నిరాడంబరంగా , సాంప్రదాయ బద్దంగా బొల్లవరం వెంకటేశ్వర స్వామి ఆలయంలో పెద్దల సమక్షంలో వివాహం జరిగింది. అనంతరం ప్రొద్దుటూరు సబ్ రిజిస్టార్ కార్యాలయంలో మ్యారేజ్ రిజిస్ట్రేషన్ చేయించారు ఎమ్మెల్యే రాచమల్లు శివప్రసాద్ రెడ్డి.

తన మొదటి కుమార్తె పల్లవి ప్రేమ, కులాంతర వివాహానికి ఒప్పుకుని ఆశీర్వదించాను అన్నారు. తన కుమార్తె ఇష్ట ప్రకారం దగ్గరుండి వివాహం చేశానని.. పేదవాడైన పవన్‌ను కలిసి చదువుకున్న రోజుల్లోనే పల్లవి ఇష్టపడటం, అతణ్నే పెళ్లి చేసుకుంటానని చెప్పడంతో.. కుమార్తె ఇష్టాన్ని, నిర్ణయాన్ని గౌరవించి ఈ వివాహం జరిపించినట్లు ఎమ్మెల్యే చెప్పారు. డబ్బుకు, హోదాకు, కులానికి విలువ ఇవ్వకుండా వారి ఇష్ట ప్రకారమే పెళ్లి చేసినట్లు తెలిపారు. ఎమ్మెల్యే శివప్రసాద్ రెడ్డి తీసుకున్న ఈ నిర్ణయంపై అందరూ ప్రశంసలు కురిపిస్తున్నారు. ఆడంబరంగా వివాహం చేస్తాను అని తన కూతురికి చెప్పిన అలాంటిదేమీ వద్దు నేను సామాన్యురాలిగా చాలా నిరాడంబరంగానే వివాహం చేసుకుంటానని తన కుమార్తె చెప్పిందని ఎమ్మెల్యే స్పష్టం చేశారు.