వంద‌ల సినిమాల‌లో న‌టించి ఎంతో మంది ప్రేక్ష‌కుల మ‌న‌సులు గెలుచుకున్నారు పావలా శ్యామల. ఆమె జీవితం చూస్తూ సినిమాల్లో మాదిరిగానే ఉంటుంది. అస‌లు సినిమా వాళ్ల జీవితాలు తెరమీద కనిపించేంతా అంద‌రంగా ఉండ‌వు.. ముఖాన మేకప్ వేస్తేనే కడుపు నిండుతుంది.. లేదంటే అంతే. బిగ్ స్టార్స్, క్యారెక్టర్ ఆర్టిస్టుల లగ్జరీ లైఫ్ వేరు కానీ.. చిన్నా చితకా పాత్రలు వేసే వాళ్లవి మాత్రం చితికిపోయే బ్రతుకులే అని చాలా సంద‌ర్భాల‌లో మ‌నం చూశాం. తెలుగులో ఏకంగా 300 సినిమాలకు పైగా పలు వైవిధ్యమైన పాత్రల్లో నటించిన పావలా శ్యామల, తనదైన యాక్టింగ్ తో ప్రేక్షకులను ఆకట్టుకోవడంలో సక్సెస్ అయ్యింది.
ఆమె చేసిన కొన్ని పాత్రలు ఆమె కెరీర్ లోనే ది బెస్ట్ గా నిలిచాయి. అయితే ఆమెను ప్రస్తుతం వృద్ధాప్య సమస్య ఇబ్బంది పెడుతోంది. సినిమాల్లో అవకాశాలు లేకపోవడంతో ప్రస్తుతం ఆమె జీవితాన్ని గడపడం చాలా కష్టంగా మారిపోయిందని వాపోతోంది. తన ఆరోగ్యం బాగోలేకపోవడం.. తన కూతురు కూడా అనారోగ్య సమస్యలతో బాధపడుతుంది. గతంలో ‘మా’లో మెంబర్‌షిప్‌ను లక్ష రూపాయలు వెచ్చించి మెగాస్టార్ చిరంజీవి ఇప్పించారని.. అలాగే తన కూతురి ఆరోగ్యం గురించి తెలుసుకుని మరో రెండు లక్షల ఆర్థిక సాయం చేశారని ఆమె తెలిపింది.
అప్పట్లో అందరూ చేసిన సాయంతో ఇప్పటిదాకా నెట్టుకొచ్చామని.. మళ్లీ పాత రోజులు వచ్చాయని వెల్లడించింది. మాకు బతుకుదెరువు లేద‌ని ఆత్మహత్యే శరణ్యమని వాపోయింది. ప్రస్తుతం ‘మా’ నుంచి తనకు ఎలాంటి సహాయం అందలేదని తెలిపింది. మంచు విష్ణు ‘మా’ ప్రెసిడెంట్ అయ్యాక తనను చూసుకునేందుకు ఒక అమ్మాయిని పెట్టారని పావలా శ్యామల తెలిపింది. అయితే ఆమె మధ్యలోనే వదిలేసి వెళ్లిపోగా, ఇప్పుడు పట్టించుకున్న నాథుడే లేడని ఏడ్చేసింది. అప్పట్లో క‌రాటే క‌ల్యాణి మా ఇంటికి వ‌చ్చి మా ఇల్లు చూసి చీద‌రించుకుంది. అంతేకాదు త‌ప్పుగా కూడా ప్ర‌చారం చేసిందంటూ చాలా బాధ‌ప‌డింది. త‌మ‌ను ఎవ‌రైన ఆదుకోవాలి అంటూ పావలా శ్యామ‌లా కోరుతుంది.
