OTT : టాలీవుడ్ లో సంక్రాంతి తర్వాత పెద్ద సినిమాల జోరు కాస్త తగ్గింది అనే చెప్పాలి. విద్యార్థుల పరీక్షలు, వేసవి సెలవలు దృష్టిలో పెట్టుకొని కొద్ది రోజుల వ‌ర‌కు పెద్ద సినిమాల‌కి బ్రేక్ ఇచ్చారు. దీంతో చిన్న సినిమాలు, వెబ్ సిరీస్ లూ రిలీజ్ కు సిద్దమవుతున్నాయి. గత వారం కూడా చిన్న సినిమాలు చాలా విడుదల కాగా, ఇదే వరుసలో ఈ వారం కూడా పలు చిన్న సినిమాలు, వెబ్ సిరీస్ లు తమ అదృష్టాన్ని పరీక్షించుకునేందుకు సిద్ద‌మ‌య్యాయి. విక్టరీ వెంకటేష్, రానా తండ్రి కొడుకులుగా నటించిన వెబ్ సిరీస్ ‘రానా నాయుడు’మార్చి 10 నుంచి నెట్ ఫ్లిక్స్ లో స్ట్రీమింగ్ కానుంది.
ఈ వెబ్ సిరీస్ పై భారీ అంచనాలే ఉన్నాయి. ‘రే డొనొవాన్’ టీవీ సిరీస్ ఆధారంగా తెలుగు నేటివిటీతో ఈ వెబ్ సిరీస్ ను రూపొందించ‌గా, వెంకటేష్, రానా ఇద్దరికీ ఇదే తొలి వెబ్ సిరీస్. ఈ సిరీస్ మంచి విజ‌యం సాధిస్తుంద‌ని ఆశిస్తున్నారు. ఇక తిలక్ ప్రభల దర్శకత్వంలో రూపొందిన వెబ్ సిరీస్ ‘యాంగర్ టేల్స్’. జీవితంలో ఎన్నో ఆశలతో ఉన్న ఓ నలుగురు వ్యక్తులకు వారికి నచ్చని జీవితం ఎదురైతే వారి పడే మానసిక సంఘర్షణ ఎలా ఉంటుంది అనే అంశం పై ఈ వెబ్ సిరీస్ రూపొంద‌గా, మార్చి 9 నుంచి డిస్నీ+హాట్ స్టార్ లో ఇది స్ట్రీమింగ్ కానుంది. మ‌ల‌యాళ చిత్రం క్రిస్టీ మార్చి 9 నుండి డిస్నీ ప్ల‌స్ హాట్ స్టార్‌లో ప్రసారం కానుంది.
ఇందులో మాళవిక మోహనన్ ప్రధాన పాత్రలో నటించారు . బాక్సాఫీస్ వద్ద డిజాస్టర్‌గా నిలిచింది. రన్ బేబీ రన్ అనేది ఆర్జే బాలాజీ మరియు ఐశ్వర్య రాజేష్ ప్రధాన పాత్రల్లో నటించిన థ్రిల్లర్ సిరీస్. ఇది మార్చి 10వ తేదీ నుండి డిస్నీ+ హాట్‌స్టార్‌లో ప్రసారం అవుతుంది. ఇక నెట్ ఫ్లిక్స్ లో ‘రేఖ’(మలయాళం) మార్చి 10, ‘ది గ్లోరి’ వెబ్ సిరీస్ 2, మార్చి 10 నుండి స్ట్రీమింగ్ కానుంది. జీ5లో రామ్ యో(కన్నడ) మార్చి 10, బొమ్మై నాయగి(తమిళ్) మార్చి 10, బౌడీ క్యాంటీన్ (బంగ్లా) మార్చి 10 నుండి స్ట్రీమింగ్ కానుంది.
