Mohan Babu : బుద్ది లేని వారే కులాల‌ని విడ‌గొడ‌తారు అంటూ మోహ‌న్ బాబు సంచ‌ల‌న వ్యాఖ్య‌లు

Mohan Babu : తిరుపతిలో కోటి హనుమాన్ చాలీసా కార్యక్రమాన్ని ఏర్పాటు చేశారు. అక్కడికి డాక్టర్ మంచు మోహన్ బాబు ముఖ్యఅతిథిగా హాజరయ్యారు. ఈ సందర్భంగా ప్రధాని మోదీపై ప్రశంసల వర్షం కురిపించారు. అయోధ్య రామమందిర ప్రాణప్రతిష్ఠకు ఆహ్వానం వచ్చిందన్నారు.ఇవాళ నేను ఏం మాట్లాడినా అది అతిశయోక్తి అనుకుంటారు. కానీ, నేను చెప్పేది అతిశయోక్తి కాదు. భారతదేశంలో ఈ మాత్రం ధైర్యంగా మనం భారతమాత బిడ్డలం, భారతీయులం, హిందువులం అని చెప్పుకోలుగుతున్నాం అంటే అందుకు కారణం ప్రధాని మోడీ ఒక్కరే. ఆయన లేకపోతే పరిస్థితులు మరోలా ఉండేవి’ మోహన్ బాబు పేర్కొన్నారు.

మనం ఉన్న పరిస్థితుల్లో కులాలు ఏవీ లేవు. అందరూ ఒకటేనని ముందుకెళుతుంటే.. తెలిసో తెలియకో కొందరు అజ్ఞానులు కులాల గురించి మాట్లాడుతుంటారు. కానీ, మన ప్రధాని మనమందరం ఒక్కటే అని చాటేలా ఇలాంటి కార్యక్రమాలు జరుపుతున్నారు. అక్కడ అయోధ్యలో చారిత్రాత్మక ఘట్టం ఆవిష్కృతం కానుంది. మోడీ చేస్తున్నవి ఇలాంటివి ఎన్నో ఉన్నాయి. ఆయనకు ఆయురారోగ్యాలు కలగాలని, నిండు నూరేళ్లు జీవించాలని, ఎల్లప్పుడూ ఆయన మనకు ప్రధానిగా ఉండాలని మనసా వాచా కోరుకుంటున్నాను అని మోహన్ బాబు వ్యాఖ్యానించారు.

మోదీ ప్రధాని కాకముందే ఆయనను మేం కుటుంబ సమేతంగా పార్క్ హయత్ హోటల్ లో కలిశాం. సార్.. మీరు ప్రధాని కావాలని కోరుకుంటున్నాం అని చెప్పాం. అందుకాయన స్పందిస్తూ.. ఎందుకు? అన్నారు. దాంతో కొన్ని అంశాలను ఆయనకు వివరించాం. దాంతో ఆయన సంతృప్తి చెంది.. నువ్వు నిజమైన కళాకారుడివి అని అభినందించారు. దేవుడి దయ ఎలా ఉందో.. చూద్దాం అని అన్నారు. ఆ విధంగా ఆయన రెండు పర్యాయాలు విజయాలు సాధించారు. ఆయన మూడోసారి కూడా గెలుస్తారు. ఇలాంటి కార్యక్రమాలు ఎన్నో, మరెన్నో జరగాలని, భారతదేశం సుభిక్షంగా ఉండాలని హృదయపూర్వకంగా కోరుకుంటున్నాను. అందరికీ మకర సంక్రాంతి శుభాకాంక్షలు” అంటూ స్పందించారు. “రామ మందిరం ప్రారంభోత్సవానికి చాలామంది వస్తున్నారు. అంతమంది మధ్యలో నేను తట్టుకోగలనో, లేదో.. వెళ్లాలని మనసులో సంకల్పం ఉంది.. హనుమంతుడి ఆశీస్సులు, ఈశ్వరేచ్ఛ ఎలా ఉంటే అలా జరుగుతుంది” అంటూ మోహన్ బాబు వ్యాఖ్యానించారు.