Manchu Manoj : ఎట్ట‌కేల‌కు మూడు ముళ్ల బంధంతో ఒక్క‌టైన మంచు మ‌నోజ్‌, భూమా మౌనిక.. పెళ్లి ఫొటోలు వైర‌ల్..

Manchu Manoj : గ‌త కొద్ది రోజులుగా మంచు మ‌నోజ్, భూమా మౌనిక‌ల పెళ్లికి సంబంధించి అనేక ప్ర‌చారాలు సాగుతున్న విష‌యం తెలిసిందే. కొంద‌రు అది నిజ‌మేన‌ని అన‌గా, మ‌రి కొంద‌రు రూమ‌ర్ అంటూ కొట్టి ప‌డేసారు. ఎట్ట‌కేల‌కు ఫిలిం నగర్‌లోని మంచు లక్ష్మి నివాసంలో వీరి వివాహం అంగరంగ వైభవంగా జరిగింది. శుక్రవారం రాత్రి సరిగ్గా 8.30 నిమిషాలకు మౌనిక మెడలో మూడు ముళ్లు వేశాడు మనోజ్‌.బంధుమిత్రులు, అత్యంత సన్నిహితుల సమక్షంలో ఈ వివాహం జరిగినట్టు సమాచారం.ఈ వివాహ వేడుకలో మనోజ్ సోదరుడు మంచు విష్ణు భార్య పిల్లలతో కలిసి పాల్గొన్నారు. నిజానికి ఈ పెళ్లి మోహన్ బాబుకు, మంచు విష్ణుకు ఇష్టం లేదని.. వారు వివాహ వేడుకకు హాజరుకావడం లేదని ప్రచారం జరిగింది. కానీ, ఆ ప్రచారంలో నిజం లేదని మంచు విష్ణు, మోహ‌న్ బాబు రాకతో తేలిపోయింది.

ఇక బంగారు వర్ణంలో ఉన్న వస్త్రాల్లో నవదంపతులు ఇద్దరూ మెరిసిపోతున్నారు. ఓ ఫొటోలో మౌనికకి మనోజ్ ప్రేమగా ముద్దు ఇవ్వడం గ‌మ‌నించ‌వ‌చ్చు. ఈ ఇద్ద‌రికి ఇది రెండో పెళ్లి కాగా, ఇద్దరూ రెండు బలమైన కుటుంబాల నుంచి రావడంతో వీరి వివాహం పై అందరిలో ఆసక్తి నెలకొంది. ఇక ఈ వివాహ వేడుకకు పెళ్లి పెద్దగా మనోజ్ సోదరి మంచు లక్ష్మి వ్యవహరించారు. తన ఇంట్లోనే తమ్ముడికి పెళ్లి చేశారు. ఈరోజు సాయంత్రం మనోజ్‌ను పెళ్లికొడుకును చేసిన లక్ష్మీప్రసన్న.. వరుడి ఫొటోను సోషల్ మీడియా ద్వారా పంచుకున్నారు.

అయితే అక్క గురించి కాస్త ఎమోషనల్ అయ్యారు మ‌నోజ్. తనకు దగ్గరుండి పెళ్లిచేయడాన్ని ఉద్దేశించి.. ‘అక్కా, ఏ జన్మ పుణ్యమో నాది. లవ్ యు అక్క. నువ్వే నా కోసం ఇంత చేస్తున్నావు.. థాంక్యూ’ అని మనోజ్ రాసుకొచ్చారు. ఇక 2015లో మంచు మనోజ్ ప్రణతి రెడ్డి అనే యువతని ప్రేమించి వివాహం చేసుకోగా, కొన్ని రోజులకే ఈ జంట మధ్య విభేదాలు తలెత్తాయి. దీనితో ఇద్దరూ విడిపోయారు. ఇక భూమా మౌనికకి కూడా ఇది రెండో పెళ్లి కాగా, గ‌తంలో బెంగుళూరుకి చెందిన బిజినెస్ మ్యాన్ గణేష్ రెడ్డిని వివాహం చేసుకుంది. ఈ జంటకు ఒక కొడుకు కూడా పుట్టాడు. కాని ఏవో కార‌ణాల వ‌ల‌న విడిపోయారు.