Lu Lu Mall : జ‌నంతో కిక్కిరిసిపోయిన లులు మాల్.. కూక‌ట్‌ప‌ల్లి ప్రాంత వాసుల‌కి న‌ర‌కం..

Lu Lu Mall: గత సంవత్సరం దావోస్‌లో జరిగిన “ప్రపంచ ఆర్థిక సదస్సు “పర్యటన సందర్భంగా తెలంగాణ ఐటీ, పరిశ్రమల శాఖ మంత్రి కేటీఆర్ యూఏఈ ప్రఖ్యాత సంస్థ లూలు గ్రూప్ తో చ‌ర్చలు జ‌రిపిన విష‌యం తెలిసిందే. చ‌ర్చ‌ల అనంత‌రం హైదరాబాద్ లో లులు షాపింగ్ మాల్ ఏర్పాటునకు ఆ సంస్థ తో ఒప్పందం కుదుర్చుకున్నారు. ఈ క్ర‌మంలో హైదరబాద్ కూకట్ పల్లిలో షాపింగ్ మాల్ ఏర్పాటు చేశారు. గతంలో కూకట్‌పల్లిలోని మంజీరా మాల్‌ ను లులు గ్రూప్‌ రీబ్రాండ్‌ చేసింది.ఈ లులు గ్రూప్ షాపింగ్ మాల్ 5 లక్షల చదరపు అడుగుల విస్తీర్ణంలో విస్తరించి ఉంది. ఈ మాల్ ను రీసెంట్‌గా మంత్రి కేటీఆర్ ప్రారంభించారు.సాధారణంగానే నగర వాసులు కొత్త‌గా ఏర్పాటైన ఏ మాల్‌ని వ‌దిలి పెట్టరు.

అయితే ఇప్పుడు ఈ లుల్ మాల్‌కి మాత్రం తాకిడి విప‌రీతంగా పెరిగింది. మూడు రోజుల సెలవుల కారణంగా చాలామంది లులు మాల్ ను సందర్శిస్తున్నారు. మాల్ కు వచ్చే ప్రేక్షకుల కారణంగా కూకట్ పల్లిలో భారీగా ట్రాఫిక్ స్తంభించిపోయింది. శనివారం రోజు ఏకంగా మూడు కిలోమీటర్ల మేర ట్రాఫిక్ జామ్ ఏర్పడింది. జేఎన్టీయూ నుండి హైటెక్ సిటీ వెళ్లే మార్గంలో లులు మాల్ నూతనంగా ఏర్పాటయింది. ఈ మాల్ ఓపెనింగ్ రోజు సైతం విపరీతమైన ప్రచారం లభించింది. అటు సోషల్ మీడియాలోనూ ఈ మాల్ పై విపరీతమైన చర్చ నడవ‌డంతో… ఒకసారైనా ఈ మాల్ కు వెళ్లాలని నగరవాసులు ఎగబడుతున్నారు. వీకెండ్ కావడంతో మాల్ కు ఒక్కసారిగా జనం పోటెత్తారు.

మూడు రోజుల సెలవులు కావడంతో ఊర్లకు వెళ్లే బస్సులు సైతం కుకట్ ప‌ల్లి రోడ్డు మీద నుండి వెళ్లడంతో ఒకవైపు ప్రైవేటు బస్సుల ట్రాఫిక్ మరోవైపు లులు మాల్ హడావిడితో కూక‌ట్ ప‌ల్లి రద్ధిగా మారిపోయింది. మాల్ కు వచ్చే జనాల కేంద్రంగా కూకట్పల్లి నుండి జేఎన్టీయూ ప్రధాన రహదారిపై కిలోమీటర్ల మేర ట్రాఫిక్ జామయ్యి భారీగా వాహనాలు నిలిచిపోయాయి. మోతాదుకు మించి జనాలు రావడంతో పోలీసులు సైతం చేతులెత్తేశారు. ఈ మాల్ దగ్గర రద్దీ కారణంగా రెండు రోజుల నుండి వాహనదారులు తీవ్ర ఇబ్బందులు ఎదుర్కొంటున్నారు.గతంలో ఐకియా ప్రారంభోత్సవంలోనూ ఇదే సీన్ కనిపించింది.. ఐకియ స్టోర్ ప్రారంభమైన మొదటి పది రోజులు విపరీతమైన రద్దీ కనిపించడం మ‌నం చూశాం. ఇప్పుడు అక్క‌డ కూడా అదే ప‌రిస్థితి క‌నిపిస్తుంది. 300 కోట్ల రూపాయలతో ఈ మాల్ ప్రారంభించారు.