Kiraak RP Nellore Chepala Pulusu : నెల్లూరు చేపల పులుసు రుచి చూడాల‌ని ప్ర‌తి ఒక్క‌రు అనుకుంటూ ఉంటారు. అయితే అంద‌రు నెల్లూరుకి వెళ్లి అక్క‌డ రుచిక‌ర‌మైన చేపల పులుసు రుచి చూడ‌లేరు. అయితే అలాంటి టేస్ట్ మాత్రం దొరికితే ఏ మాత్రం వ‌దులుకోరు. హైదరాబాద్‌లో కిరాక్ ఆర్పీ పెట్టిన నెల్లూరు పెద్దా రెడ్డి చేపల పులుసు ఇప్పుడు సోషల్ మీడియాలో మోస్ట్ ట్రెండింగ్. ఇక్కడ చేపల పులుసు కొనుక్కునేందుకు కస్టమర్లు పెద్ద ఎత్తున బారులు తీరారు. ట్రాఫిక్ జామ్ కూడా అయింది. వాళ్లందరికీ ఐటెమ్స్ అందించలేక నానా ఇబ్బందులు పడుతున్నట్టు చెప్పుకొచ్చారు కిరాక్ ఆర్పీ.
గత ఏడాది చివర్లో కూకట్ పల్లిలో ‘నెల్లూరు పెద్దారెడ్డి చేపల పులుసు పేరిట ఓ కర్రీ పాయింట్‌ని కిరాక్ ఆర్పీ స్టార్ చేశాడు. కిరాక్ ఆర్పీ స్వస్థలం నెల్లూరు కావడంతో అక్కడి నుంచి ప్రత్యేకంగా చేపల్ని తెప్పించి.. నెల్లూరు స్టయిల్‌లో చేపల పులుసుని తయారు చేయించాడు. మీడియానుంచి కూడా పబ్లిసిటీ దొరకడంతో రోజుల వ్యవధిలోనే ఆ కర్రీ పాయింట్ క్లిక్ అయ్యి రూ. లక్షల్లో బిజినెస్ జరిగింది. వీకెండ్స్‌లో ఆ కర్రీ పాయింట్‌‌కి వచ్చే వాహనదారులతో ఆ ఏరియాలో ట్రాఫిక్ జామ్ కూడా అయిందంటే అక్క‌డ ప‌రిస్థితి ఎంత‌లా ఉందో అర్ధం చేసుకోవ‌చ్చు.
కస్టమర్ల తాకిడి తట్టుకోలేక.. ఏకంగా మూడు రోజుల పాటు షాప్ మూసేసి.. మ్యాన్ పవర్ కోసం నెల్లూరుకి వచ్చేశారు ఆర్పీ. నెల్లూరులో చేపల పులుసు వండే వారితో పాటు హోటల్‌లో పని చేసే వాళ్ల కోసం వేట ప్రారబించారు. చేపల పులుసు అద్భుతంగా చేసే వారికి ఉపాధి అవకాశం కల్పించడంతో పాటు వారిని సొంత కుటుంబ సభ్యులుగా చూసుకుంటానని భరోసా ఇస్తున్నారు ఆర్పీ. నెల్లూరు మహిళలు చేపలు కడిగే పద్ధతితో పాటు కట్టెల పొయ్యి వాడటం, చేపల పులుసు చేయడం త‌న హోట‌ల్ ప్రత్యేకం అంటున్నారు. నెల్లూరులో ఉన్న వంటమాస్టర్లు, వర్కర్లను హైదరాబాద్ తీసుకొస్తామంటున్నారు.
