Jeevitha Rajasekhar : చిరంజీవిపై విమ‌ర్శ‌లు చేసిన రాజ‌శేఖర్, జీవిత‌.. జైలు శిక్ష విధించిన కోర్టు..

Jeevitha Rajasekhar : రాజ‌శేఖ‌ర్, జీవిత‌ల‌కి వివాదాలు కొత్తేమి కాదు. ప‌లు వివాదాల‌తో వారిద్ద‌రు చాలా సార్లు హాట్ టాపిక్‌గా నిలిచారు. ఇక మెగాస్టార్ చిరంజీవి 2009లో ప్రజారాజ్యం పార్టీ పెట్టినప్పటి నుంచి జీవిత-రాజశేఖర్, చిరంజీవి మధ్య గొడవలు మొదలయ్యాయి. అప్పట్లో చిరంజీవిపై వీరు చేసిన అనుచిత వ్యాఖ్యలకు అభిమానుల ఆగ్రహానికి గురయ్యారు. కారులో వెళ్తున్న ఈ దంపతులపై మెగాస్టార్ అభిమానులు దాడి చేశారు. ఆ తరువాత వీరి నడుమ మా అసోసియేషన్ లో కూడా గొడవలు జరిగిన విషయం తెలిసిందే. ప్రస్తుతం వీరి మధ్య ఎలాంటి వివాదాలు లేని సమయంలో కోర్టు సంచలన తీర్పు వెలువడటం చ‌ర్చనీయాంశంగా మారింది.

2011లో ఓ ప్రెస్ మీట్ లో జీవిత, రాజశేఖర్లు మెగాస్టార్ చిరంజీవి నిర్వహించే బ్లడ్ బ్యాంక్ ద్వారా సేకరించిన రక్తాన్ని మార్కెట్లో అమ్ముకుంటున్నారని వ్యాఖ్యలు చేశారు. నిస్వార్ధంగా చిరంజీవి సేవ చేస్తుంటే వారు అలాంటి కామెంట్స్ చేసే స‌రికి వారి వ్యాఖ్యలను సీరియస్ గా పరిగణించిన సినీ నిర్మాత అల్లు అరవింద్ కోర్టును ఆశ్రయించారు. చిరంజీవి పేరుతో ఎన్నో సేవా కార్యక్రమాలు కొనసాగుతున్నాయని, ఎంతోమందికి సహాయం దొరుకుతుందని, అటువంటి చిరంజీవి పరువుకు భంగం కలిగేలా జీవిత రాజశేఖర్ వ్యాఖ్యలు చేశారని ఆగ్రహం వ్యక్తం చేశారు. చిరంజీవి పేరుతో నడుస్తున్న కార్యక్రమాలపైన, చిరంజీవి ట్రస్ట్ పైన అసత్య ఆరోపణలు చేస్తున్నారంటూ జీవిత రాజశేఖర్ లపై పరువు నష్టం దావా వేశారు.

వారు చేసిన ఆరోప‌ణ‌ల‌ని సీడీ రూపంలో కోర్టుకి స‌బ్మిట్ చేశారు. అయితే ఈ కేసు పై సుదీర్ఘ విచారణ జరిపిన కోర్టు తాజాగా తీర్పును వెల్లడించింది. జీవిత, రాజశేఖర్ ఇద్దరికీ ఏడాది జైలు శిక్షతో పాటుగా, 5000 రూపాయలు జరిమానా విధించింది. ఈ తీర్పుపై జిల్లా కోర్టును ఆశ్రయించే అవకాశం ఉన్న నేప‌థ్యంలో జరిమానా చెల్లించిన వారిద్దరు నుంచి పూచీకత్తులను సమర్పించి బెయిల్ తీసుకుని విడుదలయ్యారు. మరి వారికి జిల్లా కోర్టులో అయిన అనుకూలంగా ఉంటుందా లేదా అన్న‌ది చూడాల్సి ఉంది.