చిన్న‌ప్పుడే ఇంత క్యూట్‌గా ఉన్న ఈ అందాల హీరోయిన్‌ని గుర్తు ప‌ట్టారా..!

టాలీవుడ్‌, బాలీవుడ్‌, కోలీవుడ్ ఇలా ప‌లు ఇండ‌స్ట్రీల‌లో స్టార్ హీరోలంద‌రితో క‌లిసి న‌టించి స్టార్ స్టేట‌స్ అందుకున్న అందాల భామ జ‌య‌ప్ర‌ద‌. సాంప్రదాయ పాత్రలైనా.. గ్లామరస్ రోల్ అయినా.. అద్భుతంగా నటించడంలో జయప్రద సిద్ధహస్తురాలు. ఒకప్పుడు స్టార్ హీరోలు అందరితో జతకట్టిన ఆమె, ఆ తర్వాత రాజకీయాల్లోనూ తన సత్తా చాటుతూ వ‌స్తున్నారు. చాలా కాలంగా రాజ‌కీయాల‌లో బిజీగా ఉంటున్న ఆమె సినిమాల‌కి దూరంగా ఉంటూ వ‌స్తున్నారు. తాజాగా జ‌య‌ప్ర‌ద చిన్న‌నాటి పిక్ ఒక‌టి నెట్టింట తెగ హ‌ల్‌చ‌ల్ చేస్తుంది. ఇందులో జ‌య‌ప్ర‌ద ఎంత క్యూట్‌గా ఉంది. ఇప్పుడే కాదు చిన్న‌ప్పుడు కూడా చాలా అందంగా ఉంద‌ని నెటిజ‌న్స కామెంట్స్ చేస్తున్నారు.

14 ఏళ్ల వయసులో పాఠశాలలో ఒక నాట్య ప్రదర్శన చేస్తుండగా సినీ నటుడు ఎం.ప్రభాకరరెడ్డి ఈమెను చూసి సినిమాల్లోకి తీసుకున్నారు. ఇండ‌స్ట్రీలోకి వ‌చ్చాక ఆమె పేరుని జ‌య‌ప్ర‌ద‌గా మార్చుకున్నారు. 1976లో విడుదలైన భూమి కోసం అనే సినిమాతో మొద‌లైన ఆమె ప్ర‌స్థానం 2005వరకు దాదాపు మూడు దశాబ్దాల వరకు సాగింది. తెలుగుతోపాటు.. కన్నడ, తమిళం, మలయాళం, హిందీ, బెంగాలీలో దాదాపు 300కు పైగా సినిమాల్లో నటించింది. పాత్ర ఏదైనా.. అందులో ఒదిగి నటించడమే ఆమెకు తెలుసు. తెరపై ఆమె కనబడినపుడు పాత్ర కనబడుతుంది కానీ నటి కనిపించదు. ఆమెను చూడగానే ఒక అంతులేని కథ, సిరిసిరిమువ్వ, సాగర సంగమం లాంటి కుటుంబ కథా చిత్రాలు ప్రేక్ష‌కుల క‌ళ్ల ముందు క‌ద‌లాడుతుంటాయి.

అడ‌విరాముడు, ఊరికి మొనగాడు లాంటి మాస్ చిత్రాల్లో నటించి మెప్పించింది జ‌య‌ప్ర‌ద‌. సీతా కల్యాణం, శ్రీ తిరుపతి వేంకటేశ్వర కల్యాణం లాంటి పౌరాణిక పాత్రలతో సీత , పద్మావతిగా ప్రేక్షకాభిమానం పొందింది. సింహాసనం, రాజపుత్ర రహస్యం వంటి జానపద చిత్రాల్లో రాజకుమారిగా అభిమానుల మందార మాలలు అందుకుంది. జయప్రద అసలు పేరు లలితా రాణి. 1962 ఏప్రిల్ 3న రాజమండ్రిలో జన్మించింది. చిన్నప్పుడే తల్లి తండ్రుల ప్రోత్సాహంతో సంగీతం, నృత్యంలో శిక్షణ తీసుకుంది జయప్రద.