Gold : బంగారం ఖ‌నిజాలు అంటే అంద‌రికి కేజీఎఫ్ చిత్రం గుర్తుకు వస్తుంది. ఈ సినిమా చూసి మ‌న ద‌గ్గ‌ర కూడా ఇలాంటిది ఉంటే బాగుండు అని అనుకున్నారు. అయితే గత కొంత కాలంగా ఖనిజ నిక్షేపాలను వెలికితీసేందుకు కేంద్ర ప్రభుత్వం ఎంత‌గానో కృషి చేస్తుంది. ఆ స‌మ‌యంలోనే జమ్ముకశ్మీర్, రాజస్థాన్ వంటి చోట్ల పెద్ద ఎత్తున లిథియం నిల్వలు బయటపడ్డ సంగతి తెలిసిందే. అరుదైన ఖనిజాలను వెలికితీయడంలో నిమగ్నమైన ప్రభుత్వ రంగ సంస్థ ఎన్ఎమ్‌డీసీ లిమిటెడ్.. ఆంధ్రప్రదేశ్‌ రాష్ట్రంలో బంగారం తవ్వకాలు చేపట్టేందుకు సిద్ధమవుతోందని తెలుస్తోంది.
ఖ‌నిజాల‌ని వెలికి తీసేందుకు సుమారు రూ.500 కోట్ల వరకు పెట్టుబడి పెట్టనున్నట్లు సమాచారం. ఆంధ్రప్రదేశ్‌లోని చిత్తూరు, అనంతపురం జిల్లాల్లో బంగారం నిక్షేపాలు పెద్ద ఎత్తున ఉన్నాయని కొంత కాలం కిందటే గుర్తించారు. జియోలాజికల్ సర్వే ఆఫ్ ఇండియా సహా మరికొన్ని సంస్థలు సర్వే చేసి బంగారం నిల్వలు ఎంత ఉన్నాయి అనే అంశంపై సమాచారాన్ని సేకరించాయి. చిత్తూరు జిల్లా కుప్పం నియోజకవర్గంలోని గుడుపల్లె మండలంలో ఉన్న ‘చిగర్ గుంట-బిసనత్తమ్’ బంగారు గనిలో 18 లక్షల టన్నుల బంగారు ఖనిజం ఉన్నట్లు అంచనాకి వ‌చ్చారు..చిత్తూరు జిల్లా గుడుపల్లి మండలంలోని ఏడు గ్రామాల్లో విస్తరించిన గోల్డ్‌ బ్లాక్‌కు సంబంధించిన లీజును ఎన్ఎండీసీ త్వరలో దక్కించుకోనుందని సమాచారం. ఈ ప్రాజెక్ట్‌ విషయమై గతేడాది ఏపీ ప్రభుత్వంతో ఎన్ఎండీసీ ఒప్పదం చేసుకుంది.
ఒక్కో టన్ను నుంచి 5 గ్రాములకు పైగా బంగారం తీయవచ్చని అంచ‌నా వేస్తున్నారు.. ఈ గనిలో తవ్వకాలు చేపట్టడానికి ఇప్పటికే రాష్ట్ర ప్రభుత్వంతో లెటర్ ఆఫ్ ఇంటెంట్ పై సంతకాలు చేసింది ఎన్ఎండీసీ. ప్రభుత్వం నుంచి పర్యావరణ అనుమతులు వంటి క్లియరెన్స్ తెచ్చుకోవడానికి ఎన్ఎండీసీ కంపెనీ ఒక కన్సల్టెంట్ ను నియమించాలని యోచిస్తుంది. ఒక్కో టన్ను ఖనిజం నుంచి సుమారు 5 గ్రాములకుపైనే బంగారం లభిస్తుందని నిర్ధరించారు. ఇప్పుడు ఈ గనిలోనే ఎన్ఎండీసీ తవ్వకాలు మొదలుపెట్టనుంది.
