Bro Movie Producer : పవన్ కళ్యాణ్, సాయి ధరమ్ తేజ్ ప్రధాన పాత్ర‌ల‌లో సముద్రఖని తెర‌కెక్కించిన చిత్రం బ్రో. త‌మిళ మూవీకి రీమేక్‌గా రూపొందిన ఈ చిత్రం జూలై 28న విడుద‌లై అన్ని చోట్ల కూడా మంచి రెస్పాన్స్ ద‌క్కించుకుంది. మాటల మాంత్రికుడు త్రివిక్రమ్ స్క్రీన్ ప్లే, డైలాగ్స్ అందించిన ఈ సినిమాలో కేతిక శర్మ, ప్రియా ప్రకాష్ వారియర్ ముఖ్య పాత్రలు పోషించారు. ఎస్.థమన్ సంగీతం సమకూర్చిన ఈ చిత్రం భారీ వసూళ్లతో దూసుకుపోతూ బాక్సాఫీస్ ద‌గ్గ‌ర ర‌చ్చ చేస్తూ రీసెంట్‌గా విజయోత్సవ సభను ఘనంగా నిర్వహించింది. ఈ వేడుకలో చిత్ర బృందంతో పాటు సినీ పరిశ్రమకు చెందిన పలువురు ప్రముఖులు పాల్గొన్నారు.
ఈ వేడుకలో చిత్ర నిర్మాత‌లు ఆసక్తికర కామెంట్స్ చేశారు. పవన్ కళ్యాణ్ గారు, సాయి ధరమ్ తేజ్ గారి కలయికలో మా 25 వ సినిమా చేయడం సంతోషంగా ఉంది. అనుకున్న సమయానికి సినిమాని పూర్తి చేయడానికి ప్రధాన కారణం సముద్రఖని గారు. ఇంత మంచి సినిమాని, త్రివిక్రమ్ గారు తన సంభాషణలతో ప్రేక్షకుల హృదయాల్లోకి తీసుకెళ్లారు. మామూలుగా నాకు సినిమా చూసేటప్పుడు ఫోన్ చూసే అలవాటు ఉంటుంది. అలాంటిది ఈ సినిమా చూసేటప్పుడు ఒక్కసారి కూడా ఫోన్ చూడలేదు. డిస్ట్రిబ్యూటర్స్ అందరూ ఎంతో సంతోషంగా ఉన్నారు అని అన్నారు. మ‌రోవైపు ఈ సినిమాని కొంద‌రు త‌ప్పుగా ప్రచారం చేస్తున్నారంటూ నిర్మాత స్ట‌న్నింగ్ కామెంట్స్ చేశారు.
ముందు నుంచి అనుకున్నట్లుగానే ఈ సినిమాలో ఇచ్చిన సందేశం కుటుంబ ప్రేక్షకులకు బాగా చేరువైంది. ఈ సినిమాకి పెద్ద రన్ ఉంటుందని ఆశిస్తున్నాం. పవన్ కళ్యాణ్ గారు ఎంత బిజీగా ఉన్నప్పటికీ ఈ సినిమాని పూర్తి చేయడానికి అందించిన సహకారం మరవలేనిది. తేజ్ గారు అంత పెద్ద యాక్సిడెంట్ తర్వాత కూడా ఎంతో కష్టపడి సినిమాకి ప్రాణం పోశారు. థమన్ అద్భుతమైన సంగీతం అందించారు. సముద్రఖని గారు 24 గంటలు సినిమా గురించే ఆలోచిస్తారు. ఈ సినిమా విజయంలో భాగమైన ప్రతి ఒక్కరికి కృతఙ్ఞతలు అని సహ నిర్మాత వివేక్ కూచిబొట్ల అన్నారు.
