Avatar 2 : అవ‌తార్ 2 రికార్డ్ క‌లెక్ష‌న్స్.. 12 రోజుల‌లో ఎన్ని వసూళ్లు రాబ‌ట్టింది అంటే..!

Avatar 2 : 2009లో వచ్చిన ‘అవతార్’ చిత్రం ఎంత సెన్సేష‌న్ క్రియేట్ చేసిందో ప్ర‌త్యేకంగా చెప్ప‌న‌క్క‌ర్లేదు. ఈ చిత్రం పెద్ద బ్లాక్ బస్టర్ అయింది. 13 ఏళ్ల క్రితమే వందల కోట్లు కలెక్ట్ చేసిన అవ‌తార్ మూవీకి సీక్వెల్ గా ‘అవతార్ 2′(అవతార్ ది వే ఆఫ్ వాటర్) కూడా రాబోతున్నట్టు ప్రకటన వచ్చినప్పటి నుండి సినిమా పై భారీ అంచనాలు ఏర్పడ్డాయి. ప్రపంచం మొత్తం ఎంతో ఆత్రంగా ఎదురుచూసిన ఈ సినిమా డిసెంబర్ 16 న గ్రాండ్ గా రిలీజ్ అయ్యింది. హాలీవుడ్ లెజెండ్ జేమ్స్ కామెరాన్ దర్శకత్వంలో రూపొందిన భారీ బడ్జెట్ మూవీ ని మొదటి భాగంలో నటించిన వాళ్లతోనే ఈ సినిమాను కూడా తెరకెక్కించారు. విజువల్ వండర్‌గా రూపొందిన ఈ మూవీ దాదాపు 350 – 400 మిలియన్ డాలర్లకు పైగా బ‌డ్జెట్తో రూపొంద‌గా, ప్రపంచ వ్యాప్తంగా అత్యధిక లొకేషన్లలో రిలీజ్ అయింది.

ఇండియాలోనూ ఈ మూవీ భారీ స్థాయిలో థియేట్రికల్ బిజినెస్‌ చేసుకుంది. దీంతో ఇండియా వ్యాప్తంగా ఇది ఎక్కువ థియేటర్లలో విడుదలైంది. అందుకు అనుగుణంగానే అత్యధిక వసూళ్లతో దూసుకుపోతోంది. విజువల్ వండర్‌గా రూపొందిన ‘అవతార్ ది వే ఆఫ్ వాటర్’ మూవీకి తెలుగులోనూ భారీ స్థాయిలో వసూళ్లు వ‌స్తున్నాయి. రెండో వీకెండ్‌లోనూ సత్తా చాటిన ఈ మూవీ.. 12వ రోజైన మంగళవారం కాస్త వెనుకబడింది. అయినప్పటికీ దీనికి రూ. 2.35 కోట్లు గ్రాస్ వసూలు అయింది.

‘అవతార్ ది వే ఆఫ్ వాటర్’కు తెలుగు రాష్ట్రాల్లో 12 రోజుల్లో నైజాంలో రూ. 38.78 కోట్లు, సీడెడ్‌లో రూ. 8.58 కోట్లు, ఆంధ్రప్రదేశ్‌లోని ఏరియాలు కలిపి రూ. 25.17 కోట్లతో కలిపి రూ. 72.53 కోట్లు గ్రాస్‌ వసూలు అయింది. మొత్తం కలిపి దీనికి రూ. 77.20 కోట్లు వచ్చాయి. దీంతో తెలుగులో రూ. 50 కోట్లు గ్రాస్ టార్గెట్‌తో వచ్చిన ఇది 12 రోజుల్లో రూ. 27.20 కోట్లు లాభాలు సాధించిందని చెప్పాలి. ప్రతి రోజూఈ మూవీ తక్కువలో తక్కువగా రూ. 20 కోట్లు గ్రాస్ వసూలు అవుతుంది. ఇలా 12 రోజుల్లోనే ఈ మూవీకి రూ. 274.05 కోట్లు నెట్‌, రూ. 317.40 కోట్లు గ్రాస్‌ వచ్చింది. ఈ క్ర‌మంలో అవ‌తార్ 2 సినిమా 2022లో టాప్ మూవీగా రికార్డును సాధించింది.