Ashish Vidyarthi : మ‌హేష్ బాబు హీరోగా పూరీ జ‌గ‌న్నాథ్ తెర‌కెక్కించిన పోకిరి చిత్రంలో పోలీస్ ఆఫీస‌ర్ పాత్ర‌లో విల‌నిజం ప్ర‌ద‌ర్శించాడు ఆశిష్ విద్యార్ధి. తాజాగా ఆయ‌న త‌న రెండో పెళ్లితో వార్త‌ల‌లోకి ఎక్కాడు. ఈయ‌న అరవై ఏండ్ల వయసులో రెండో పెళ్లి చేసుకున్నారు. అస్సాంకు చెందిన ఫ్యాషన్‌ ఎంటర్‌ప్రెన్యూర్‌ రూపాలి బారువాతో మూడు ముళ్ల బంధంలోకి అడుగుపెట్టారు. గురువారం కోల్‌కతాలో నిరాడంబరంగా వీరి వివాహం జరిగింది. అతికొద్ది మంది కుటుంబ సభ్యుల సమక్షంలో తాము రిజిస్టర్‌ మ్యారేజ్ చేసుకున్నామని ఆశీష్‌ విద్యార్థి చెప్పుకురావ‌డంతో పాటు త‌మ పెండ్లి ఫొటోలను సోషల్‌మీడియాలో షేర్ చేశారు.
20 ఏండ్ల క్రితం నటి శాకుంతల బారువా కుమార్తె రాజోషి బారువాను ప్రేమించి పెండ్లి చేసుకున్నారు ఆశీష్‌ విద్యార్థి. వీరికి ఆర్త్‌ విద్యార్థి అనే కుమారుడు ఉన్నాడు. అయితే పెళ్లైన కొన్నాళ్ల‌కు వీరి మ‌ధ్య మనస్పర్థలు రావడంతో విడాకులు తీసుకున్నారు. ఆ తర్వాత ఫ్యాషన్‌ ఎంటర్‌ప్రెన్యూర్‌ రుపాలీతో ఆశీష్‌ విద్యార్థికి పరిచయం ఏర్పడి, అది స్నేహంగా.. ఆ తర్వాత ప్రేమగా మారింది. కోల్‌కతాలోని ఓ ప్రముఖ ఫ్యాషన్‌ స్టోర్‌లో రూపాలీకి పార్టనర్‌షిప్‌ కూడా ఉన్నట్లు తెలుస్తోంది. ఆశిష్ జాతీయ స్థాయిలో క్యారెక్టర్‌ ఆర్టిస్టుగా పేరు తెచ్చుకున్నారు.
తెలుగులో గుడుంబా శంకర్‌, పోకిరి, లక్ష్యం, అలా మొదలైంది, నాన్నకు ప్రేమతో వంటి చిత్రాలతో పాపులర్‌ అయ్యారు. కన్నడ, తమిళం, మలయాళం, బెంగాలీ, ఒడియా, ఇంగ్లీష్‌ చిత్రాల్లోనూ ఆశీష్‌ విద్యార్థి నటించాడు. అయితే ఆయ‌న రెండో పెళ్లిపై మొద‌టి భార్య స్పందించింది. మీరు చాలా మంచి వారు. మీరు ఏం చేసినా నేను మిమ్మల్ని ప్రశ్నించను. మీరు బాధ కలిగించే పని చేయరు. అది మాత్రం గుర్తుంచుకోండి. అని ఒక పోస్ట్ షేర్ చేసింది.. అనంత‌రం మీ మనసులో చింతలు, సమస్యలు, సందేహాలు ఉన్నా కూడా వాటిని తొలగించండి. వీటన్నింటి తర్వాత మీకు ప్రతిదీ స్పష్టంగా అర్దమవుతుంది. అప్పుడు మీ జీవితంలో శాంతి, సౌఖ్యం మిగులుతుంది. చాలా కాలంగా మీరు సమస్యలతో పోరాడుతున్నారు. మీకు అంతా మంచి జరగాలి..కాని చిక్కుల్లోఇరుక్కోవ‌ద్దు అని రాజ్‌షీ బారువా త‌న పోస్ట్‌లో పేర్కొంది.
