Adipurush VFX : ఆదిపురుష్ విష‌యంలో అబద్దం చెబుతున్న‌ది ఎవ‌రు.. చిత్ర బృంద‌మా లేక వీఎఫ్ఎక్స్ కంపెనీయా..?

Adipurush VFX : రాధే శ్యామ్ చిత్రం త‌ర్వాత ప్ర‌భాస్ నుండి వ‌స్తున్న‌చిత్రం ఆదిపురుష్‌. భారీ అంచ‌నాల మ‌ధ్య సంక్రాంతి కానుక‌గా విడుద‌ల కానున్న ఈ సినిమా ఐమ్యాక్స్ 3డీలో అత్యంత భారీ ఎత్తున విడుదలకు సిద్ధమవుతోంది. ఇతిహాస గాథ రామాయణం ఆధారంగా తెరకెక్కుతోన్న ఈ చిత్రంలో రాముడిగా ప్రభాస్, సీతగా కృతి సనన్, లంకేశ్వరుడిగా సైఫ్ అలీఖాన్ కనిపించనున్నారు. చిత్ర ప్ర‌మోష‌న్‌లో భాగంగా మూవీ నుండి టీజ‌ర్ విడుదల చేశారు. అయితే ఈ టీజ‌ర్ బొమ్మ‌ల గార‌డీ మాదిరిగానే ఉంద‌ని, ప్ర‌భాస్ రేంజ్‌కి త‌గ్గ‌ట్టు లేద‌ని కొంద‌రు ఆరోపిస్తున్నారు.

టీజర్‌లో కొన్ని సన్నివేశాలను మోషన్ క్యాప్చ‌ర్ లో యానిమేట్ చేయ‌డంతో ఆ పాత్రలు సహజత్వాన్ని కోల్పోయాయి. ప్రభాస్, సైఫ్ అలీ ఖాన్ సైతం బొమ్మల మాదిరిగా మారిపోయారు. దీన్నే ప్రేక్షకులు జీర్ణించుకోలేకపోతున్నారు. టీజ‌ర్‌లో వానరాలకు బదులు గొరిల్లాలను దించడం విమర్శల పాలు చేసింది. ఆ సన్నివేశాలన్నీ హాలీవుడ్ సినిమాల నుంచి కాపీ కొట్టేశారని ఆరోపణలు వచ్చాయి. అయితే ఈ కంప్యూటర్ గ్రాఫిక్స్‌ను ముంబైకి చెందిన NY VFXWaala అనే వీఎఫ్ఎక్స్ స్టూడియో చేసిందని సోషల్ మీడియాలో ప్రచారం జరుగుతోంది. దీంతో ఈ పుకార్లపై ఆ సంస్థ స్పందిస్తూ మీడియాకు ఒక ప్రకటనను విడుదల చేసింది.

ఆదిపురుష్ కంప్యూటర్ గ్రాఫిక్స్, స్పెషల్ ఎఫెక్ట్స్ తాము చేయలేదని ఒక‌ ప్రకటనలో NY VFXWaala పేర్కొంది. ఆదిపురుష్ సినిమా సీజీ లేదా స్పెషల్ ఎఫెక్ట్స్ కి మేము ప‌ని చేయ‌లేద‌ని, ఇప్పుడు కూడా పనిచేయ‌డం లేదని వారు క్లారిటీ ఇచ్చారు. అయితే NY VFXWaala సహ వ్యవస్థాపకుడు ప్రసాద్ సుతార్ గతంలో తమ బృందం ఆదిపురుష్ చిత్రానికి పని చేస్తోందని గ‌తంలో అనేక ఫోటోలు షేర్ చేశాడు. సుతార్ ట్విట్టర్ ప్రొఫైల్ హెడర్‌లో ఇప్పటికీ ఆదిపురుష్ చిత్రం పోస్ట‌ర్ ఉంది. మ‌రి ఇలాంటి స‌మ‌యంలో ఎవ‌రు అబ‌ద్ధాలు చెబుతున్నారో ఎవ‌రికీ తెలియ‌రావ‌డం లేదు. NY VFXWaala వీఎఫ్ఎక్స్ స్టూడియోను బాలీవుడ్ హీరో అజయ్ దేవగణ్ స్థాపించారు. ఇండియన్ వీఎఫ్ఎక్స్ నిపుణులు నవీన్ పాల్, ప్రసాద్ సుతార్‌తో కలిసి అజయ్ దేవగణ్ ఈ సంస్థను నెలకొల్పారు.