ఏ రూపంలో ఉన్న గ‌ణ‌ప‌తిని పూజిస్తే.. ఎలాంటి ఫ‌లితాలు క‌లుగుతాయో తెలుసా..?

హిందువులు ఏ శుభ‌కార్యం చేసినా.. పూజ చేసినా ముందుగా గ‌ణ‌ప‌తినే పూజిస్తారు. ఎందుకంటే ఆయ‌న విఘ్నేశ్వ‌రుడు. క‌నుక విఘ్నాలు క‌ల‌గ‌కుండా చూస్తాడు. మ‌నం త‌ల‌పెట్టే ప‌ని విజ‌య‌వంతంగా పూర్తి కావాల‌ని ముందుగా గ‌ణ‌ప‌తికే పూజ చేస్తారు. అలా పూజ చేసేలా ఆయ‌న‌కు వ‌రం ఉంటుంది. అయితే వివిధ ర‌కాల రూపాల్లో ఉండే గ‌ణ‌ప‌తిని పూజిస్తే భిన్న ఫ‌లితాలు క‌లుగుతాయి. ఏయే రూపాల్లో ఉండే గ‌ణ‌ప‌తిని పూజిస్తే.. ఎలాంటి ఫ‌లితాలు క‌లుగుతాయో ఇప్పుడు తెలుసుకుందాం.

హరిద్ర గణపతిని పూజగదిలో పెట్టుకుని పూజిస్తే ధన, కనక, వస్తు, వాహనాలు వృద్ధి చెందుతాయి. పసుపు గణపతి లేక హరిద్ర గణపతి పూజ వల్ల‌ దేహ కాంతి పెరుగుతుంది. సమస్త చర్మ రోగాలు నయం అవుతాయి. పసుపు గణపతి పూజతోపాటు గౌరీ దేవీని పూజించటం ద్వారా ఇంట్లో వుండే వధువుకు లేక వరుడికి ఉండే వివాహ దోషాలు తొలగిపోతాయి. వివాహం నిశ్చయం అవుతుంది. హరిద్ర గణపతిని పూజిస్తే డబ్బు సమస్య రాదు అప్పుల బాధ తొలగిపోతుంది. కామెర్లు ఉన్నవారు హరిద్ర గణపతిని దానంగా ఇస్తే కామెర్ల రోగం తొల‌గిపోతుంది. దుకాణల్లో చాలా రోజులుగా అమ్ముడు పోకుండా మిగిలిఉండే వస్తువులపై హరిద్ర గణపతిని తాకిస్తే వెంటనే ఆ వ‌స్తువులు విక్ర‌యించ‌బ‌డ‌తాయి. వ్యాపారం బాగా కొన‌సాగుతుంది.

పగడపు గణపతిని పూజించటం వల్ల ఆరోగ్య రక్ష కలుగుతుంది. నర‌ దిష్టి కలగకుండా కాపాడుతుంది. ఇంటిలో, వ్యాపార సంస్ధలలో తూర్పు దిక్కు దోషాలు ఉన్నవారు, ప్రభుత్వ ఉద్యోగంలో ఇబ్బందులు ఉన్నవారు, నేత్రసమస్యలు ఉన్నవారు, తరచూ అనారోగ్య సమస్యల బారిన ప‌డుతున్న‌వారు, రుణ విముక్తి కోసం.. పగడపు గణపతిని పూజించాలి. దీంతో అన్ని స‌మ‌స్య‌లు పోతాయి. అలాగే మరకత గణపతిని పూజించడం ద్వారా తెలివితేటలు పెరుగుతాయి. జ్ఞాపకశక్తి పెరుగుతుంది. వ్యాపారం అభివృద్ధి పథంలో నడుస్తుంది. గుండె జబ్బులు, ప్రసరణ వ్యవస్థలో లోపాలు, ఆపరేషన్ తర్వాత త్వరగా కోలుకోవడం వంటివి జ‌రుగుతాయి. శరీరంలో ప్రాణ శక్తి పెరుగుతుంది. కంటి చూపు మెరుగు ప‌డుతుంది. డ‌బ్బు వృథాగా ఖ‌ర్చు కాదు.

ఉద్యోగంలో ఉన్నతి, సంఘంలో గౌరవం కోసం చందన గణపతిని పూజించాలి. భార్యాపుత్రులతో సుఖజీవనం, వృత్తి, ఉద్యోగాలలో తగాదాలు లేకుండా ఉండడానికి స్ఫ‌టిక గణపతిని పూజించాలి. వెండి గణపతిని పూజించినా ఇదే ఫలితం వస్తుంది. అధిక శ్రమ నుంచి విముక్తి, శ్రమకు తగిన ఫలితం దక్కడానికి నల్లరాయితో చేసిన గణపతిని పూజించాలి. అంతేకాకుండా వీధి శూల నివారణకి కూడా నల్ల రాతి వినాయక విగ్రహాలనే వాడడం మంచిది.

శ్వేతార్కం లేదా తెల్ల జిల్లేడు మొక్క ఇంట్లో ఉంటే ఇక వారికి దారిద్య్ర బాధలు ఉండవు. శ్వేతార్క మూలానికి వశీకరణశక్తి ఉంటుంది. నరుల దిష్టి త‌గ‌ల‌కుండా ఇది కాపాడుతుంది. ఇంటిలో, వ్యాపార సంస్ధలలో తూర్పు దిక్కు దోషాలు ఉన్నవారు, ప్రభుత్వ ఉద్యోగంలో ఇబ్బందులు ఉన్నవారు, నేత్రసమస్యలు ఉన్నవారు, తరచూ అనారోగ్య సమస్యలు వ‌స్తున్న‌వారు శ్వేతార్క గణపతిని పూజించటం వ‌ల్ల మంచి ఫ‌లితాలు పొంద‌వ‌చ్చు. అలాగే శ్వేతార్క వేరుని తాయ‌త్తులో ధరించడం వ‌ల్ల అంతా మేలే జ‌రుగుతుంది. ఇలా భిన్న రూపాల్లో ఉండే గ‌ణ‌ప‌తిని పూజిస్తే భిన్న ర‌కాల ఫ‌లితాల‌ను పొంద‌వ‌చ్చు. అన్ని ర‌కాల స‌మ‌స్య‌ల నుంచి విముక్తి ల‌భిస్తుంది.