Chiranjeevi : మెగాస్టార్ చిరంజీవికి సినిమా ప‌రాజ‌యాలు కొత్తేం కాదు. త‌న కెరీర్ లో ఎన్నో బ్లాక్ బ‌స్ట‌ర్ హిట్స్ చూసిన ఆయ‌న ఘోరమైన ఫ్లాప్ లు కూడా చూసాడు. కొన్ని సంద‌ర్భాల్లో త‌న ఫ్లాప్ సినిమాల గురించి కూడా మాట్లాడడం జ‌రిగింది. ఫ్లాప్ సినిమా తీసిన ద‌ర్శ‌కుల‌తో మ‌ళ్లీ మ‌ళ్లీ సినిమాలు కూడా తీసిన చ‌రిత్ర ఆయ‌న‌ది. కానీ ఆచార్య డిజాస్ట‌ర్ త‌రువాత ఆ చిత్ర ద‌ర్శ‌కుడి విష‌యంలో ఆయ‌న ప్ర‌వ‌ర్త‌న మాత్రం అంద‌రిని ఆశ్చ‌ర్యానికి గురి చేస్తుంది.
ఆచార్య ఫ్లాప్ త‌రువాత చిరంజీవి ఒక సినిమా ఫంక్ష‌న్ లో మాట్లాడుతూ ద‌ర్శ‌కులు సెట్ లో అప్ప‌టిక‌ప్పుడే మాట‌లు రాయ‌డం గురించి విమ‌ర్శించాడు. అయితే ఇది ఒక సినిమాను ఉద్దేశించి అన‌లేద‌ని ఆయ‌న చెప్పిన‌ప్ప‌టికీ చాలా మంది కొర‌టాల శివ ను టార్గెట్ చేసార‌ని భావించడం జ‌రిగింది. ఇంకా చాలా సంద‌ర్భాల్లో ఆయ‌న ఆచార్య సినిమా గురించే ప్ర‌స్తావించ‌డం, ప‌రోక్షంగా ద‌ర్శ‌కుడిని నిందించ‌డం కూడా చేసాడు. కానీ ఇదివ‌ర‌కెప్పుడూ లేని విధంగా త‌న సినిమా ఫ్లాప్ విష‌యంలో చిరంజీవి ఇలా ప‌దే ప‌దే దాని గురించి ప్ర‌స్తావించి ఎందుకు కుమిలిపోతున్నాడ‌ని కొంద‌రు త‌మ సంశ‌యాన్ని వ్య‌క్తం చేస్తున్నారు.
తాజాగా ఒక ఇంట‌ర్య్వూలో మాట్లాడుతూ త‌ను రామ్ చ‌ర‌ణ్ ఇద్ద‌రూ క‌లిసి 80 శాతం డ‌బ్బుల‌ను ఆచార్య డిస్ట్రిబ్యూట‌ర్ల‌కు, సినిమా కొన్న‌వారికి తిరిగి ఇచ్చేసిన‌ట్లు తెలిపాడు. అయితే చిరంజీవి, రామ్ చ‌ర‌ణ్ లు మొద‌టిసారి ఎక్కువ సేపు తెర‌పై క‌నిపించేలా క‌లిసి చేసిన ఆచార్య సినిమాను చిరంజీవి చాలా వ్య‌క్తిగ‌తంగా తీసుకోవడం, ఎంతో న‌మ్మ‌కంతో తీసిన సినిమా కావ‌డంతో ఆచార్య ఫ్లాప్ ను ఆయ‌న త‌ట్టుకోలేక పోతున్నార‌ని అంటున్నారు. ఎంతో మ‌న‌సు పెట్టి తీసిన చిత్రం కావ‌డంతో దాని నుండి బ‌య‌ట‌కు రాలేక‌పోతున్నార‌ని ఆయ‌న స‌న్నిహితులు అభిప్రాయ‌ప‌డుతున్నారు.
అయితే కొర‌టాల శివ‌కు సినిమా తీసే విష‌యంలో ఎవ‌రికీ ఇవ్వ‌నంత స్వేఛ్చ‌ను ఇచ్చిన‌ప్ప‌టికీ , మొత్తం షూటింగ్ అయిపోయిన త‌రువాత కూడా కాజ‌ల్ అగ‌ర్వాల్ న‌టించిన సీన్ల‌ను క‌త్తిరించ‌డానికి ఒప్పుకున్న‌ప్ప‌టికీ అత‌ను ఇలాంటి సినిమా తీయ‌డం చిరుని చాలా బాధించింద‌ని కొంద‌రు అంటున్నారు. ఇక ఇప్ప‌టికైనా చిరంజీవి ఆచార్య అనే పీడ‌క‌ల నుండి బ‌య‌ట‌కు రావాల‌ని ఆయ‌నకు ద‌గ్గ‌ర‌గా ఉండేవారు స‌ల‌హా ఇస్తున్నారు.
