Chiranjeevi : మెగా ఫ్యామిలీ హీరో రామ్ చరణ్ పెళ్లైన 11 ఏళ్ల‌కు తండ్రి ప్ర‌మోష‌న్ అందుకున్న‌డు. ఈ రోజు ఉద‌యం ఉపాసన పండంటి ఆడబిడ్డకి జన్మించింది. దీంతో మెగా కుటుంబంలో సంతోషం వెల్లివిరుస్తుంది. చాలా సంవత్సరాలుగా రామ్ చరణ్ – ఉపాసన దంపతులకు పిల్లలు లేకపోవడంతో అనేకచోట్ల ఈ ప్రశ్నను వారు ఫేస్ చేయాల్సి వచ్చింది. సోషల్ మీడియాలోనూ ఉపాసన ను టార్గెట్ చేసి వారసులను ఇవ్వడంలేదని ఎంత‌గానో విమ‌ర్శించారు. వీట‌న్నింటికి వారు మౌనంతో సమాధానం ఇచ్చారు. అయితే ఎట్ట‌కేల‌కు మంగళవారం తెల్లవారుజామున 01:49 కు మెగా ఫ్యామిలీ లోకి మరో బుజ్జాయి వచ్చింది.
మెగా ఫ్యామిలీలోకి మరో ప‌ర్స‌న్ రావడంతో ఆ ఇంట సంబురాలు అంబ‌రాన్నంటాయి. తమకు మనవరాలు పుట్టడం పై మెగాస్టార్ చిరంజీవి ఆనందం వ్యక్తం చేశారు. సోషల్ మీడియా వేదికగా ఆయన తన ఆనందాన్ని అందరికీ తెలియజేశారు. ఎన్నో ఏళ్ళుగా వేచి చూసిన ఆనంద క్షణాలు ఇవని మెగాస్టార్ చిరంజీవి పేర్కొన్నారు. వెల్కమ్ లిటిల్ మెగా ప్రిన్సెస్ అంటూ తన మనవరాలిని స్వాగతించిన మెగాస్టార్ చిరంజీవి నీ రాకతో మెగా ఫ్యామిలీ లో ఆనందాన్ని తీసుకువచ్చావు అంటూ పేర్కొన్నారు. నీ రాకతో అంతా సంతోషంగా ఉన్నామని తెలియజేశారు. కోట్లాది మంది ఆశీర్వదించిన రామ్ చరణ్ ఉపాసనల కూతురిగా, మమ్మల్ని తాతా నానమ్మలను చేశావు అంటూ చిరంజీవి పేర్కొన్నారు.
ఇప్ప‌టికే చిరంజీవి ఇద్ద‌రు కూతుళ్లకి ఇద్ద‌రు ఇద్ద‌రు అమ్మాయిలు ఉన్నారు. ఇప్పుడు రామ్ చరణ్కి కూడా కూతురు పుట్ట‌డంతో చిరు మ‌న‌వ‌రాళ్ల సంఖ్య ఐదుకి చేరింది. అయితే ఉదయమే ఆసుపత్రికి వచ్చి మనవరాలిని చూసుకున్న చిరంజీవి… కాసేపటి క్రితం మళ్లీ చిన్నారిని చూసుకునేందుకు వచ్చారు. ఈ సందర్భంగా అపోలో ఆసుపత్రి వద్ద ఉన్న మీడియాతో మాట్లాడారు. మంగళవారం నాడు అమ్మాయి పుట్టిందని.. ఆంజనేయస్వామిని తాము నమ్ముకున్నామని, ఆయనకు ప్రత్యేకమైన మంగళవారంనాడు ఆడబిడ్డ జన్మించడాన్ని తాము అపురూపంగా భావిస్తున్నామని చెప్పారు. అపోలో ఆసుపత్రి ఛైర్మన్ పీసీ రెడ్డిగారు (ఉపాసన తాత) దగ్గరుండి అన్ని రకాలుగా కేర్ తీసుకున్నారని, బెస్ట్ మెడికల్ టీమ్ ని ఏర్పాటు చేశారని తెలిపారు. ఎలాంటి రిస్క్ లేకుండా అన్ని జాగ్రత్తలు తీసుకున్నారని చెప్పారు. ఉపాసనకు సుఖ ప్రసవం జరిగిందని చెప్పుకొచ్చారు. పోలికలు ఎవరివి వచ్చాయనే విషయాన్ని అప్పుడే చెప్పలేమని కూడా ఆయన అన్నారు.
