Aadipurush : ఎప్పుడెప్పుడా అని ఎదురు చూస్తున్న ఆదిపురుష్ చిత్రం నేడు ఎట్టకేల‌కు థియేట‌ర్స్ లోకి వ‌చ్చేసింది. భారీ అంచనాలతో ప్రేక్షకుల ముందుకు వచ్చిన ఈ చిత్రానికి మిక్స్ డ్ టాక్ వ‌స్తుంది. భారతీయులు ఎంతో భక్తి శ్రద్దలతో ఆరాధించే పుణ్యపురుషుడు శ్రీరాముడి పాత్రలో ప్రభాస్ నటించిన చిత్రం ఇది కావ‌డంతో కొన్నాళ్లుగా ఫ్యాన్స్ ఎంతో ఆస‌క్తిగా ఎదురు చూశారు.. రామాయణం పురాణం ఆధారంగా దర్శకుడు ఓం రౌత్ ఈ చిత్రాన్ని తెరకెక్కించారు. ఎన్నో వివాదాల మధ్య నలుగుతూ.. అదే విధంగా భారీ అంచనాలతో ఈ చిత్రం ప్రేక్షకుల ముందుకు వ‌చ్చింది. చిత్రంలో శ్రీరాముడిగా ప్రభాస్ నటించగా .. జానకి పాత్రలో కృతి సనన్.. రావణాసురుడిగా సైఫ్ అలీఖాన్ నటించారు.విజువల్ వండర్ గా ప్రేక్షకుల ముందుకు వచ్చిన ఈ సినిమాపై ప్రేక్ష‌కులు ఎలా స్పందించార‌నేది చూస్తే..
ప్రభాస్ నటించిన ఆదిపురుష్ సినిమాకు ప్రీమియ‌ర్స్‌, బెనిఫిట్‌షోల నుంచే మిక్స్‌డ్ రెస్పాన్స్ రావ‌డంతో ఫ్యాన్స్ జీర్ణించుకోలేక‌పోయారు. ప్రభాస్ అభిమానులు మాత్రం సినిమా బ్లాక్‌బ‌స్ట‌ర్ హిట్ అంటూ చెబుతోన్నారు. మ‌రికొందరు ఆడియెన్స్ మాత్రం సినిమాలోని గ్రాఫిక్స్, క్యారెక్ట‌ర్స్ లుక్స్‌, స్టోరీ టెల్లింగ్ బాగాలేదంటూ కామెంట్స్ చేస్తోన్నారు.అప్పుడు ఎన్టీఆర్ రాముడిగా అద‌ర‌గొట్ట‌గా, ఇప్పుడు ప్రభాస్ కూడా రాముడి పాత్రలో అద‌ర‌హా అనిపించాడు. న‌టీన‌టుల ప‌ర్‌ఫార్మెన్స్ బాగానే ఉంద‌ని అనిపించిన కూడా గ్రాఫిక్ వాల్యూస్ సినిమాని చాలా చెడ‌గొట్టాయ‌ని చెప్పుకొస్తున్నారు.
ఆదిపురుష్ చూసిన ఓ యువ‌కుడు సినిమా బాగాలేదంటూ కామెంట్ చేయ‌డంతో ప్రభాస్ ఫ్యాన్స్ అత‌డిపై తిట్ల దండ‌కానికి దిగారు. అంత‌టితో ఆగ‌కుండా థియేట‌ర్ ముందే అత‌డిని చిత‌క‌బాదారు. రాముడి పాత్ర‌కు ప్రభాస్ అస‌లు సూట్ కాలేద‌ని ఆ అభిమాని కామెంట్ చేశాడు. సినిమాలోని గ్రాఫిక్స్ వీడియోగేమ్ త‌ర‌హాలో ఉన్నాయంటూ ఆదిప‌రుష్ సినిమాపై నెగెటివ్ కామెంట్స్ చేశాడు. అత‌డి కామెంట్స్‌తో ఆగ్ర‌హానికి గురైన ప్రభాస్ ఫ్యాన్స్ అంద‌రిముందే ఆ యువ‌కుడికి చిత‌క‌బాదారు. ప్ర‌స్తుతం ఇందుకు సంబంధించిన వీడియో నెట్టింట హ‌ల్‌చ‌ల్ చేస్తుంది.
