YS Sharmila : దివంగత నేత, మాజీ ముఖ్యమంత్రి వైఎస్ రాజశేఖర్‌రెడ్డి వర్థంతి సందర్భంగా కుమార్తె, వైఎస్సార్టపీ అధినేత్రి వైఎస్ షర్మిల నివాళులర్పించారు. శనివారం ఉదయం ఇడుపులపాయలోని వైఎస్ఆర్ ఘాట్‌కు చేరుకున్న షర్మిల.. తల్లి విజయమ్మతో కలిసి తండ్రి వైఎస్సార్‌కు శ్రద్ధాంజలి ఘటించారు. అనంతరం అక్కడ ఏర్పాటు చేసిన ప్రత్యేక ప్రార్థనల్లో షర్మిల పాల్గొన్నారు. అన్నాచెల్లెళ్లు.. ఏపీ సీఎం వైఎస్ జగన్మోహన్ రెడ్డి, వైఎస్సార్టీపీ అధినేత్రి షర్మిల మధ్య మరోసారి విభేదాలు బహిర్గతమయ్యాయి. తండ్రి వైఎస్ ఆర్ వర్దంతి కార్యక్రమాల్లో ఎవరికి వారుగా వేరు వేరుగా అన్నాచెల్లెళ్లు హాజ‌రై అంద‌రిని ఆశ్చ‌ర్య‌ప‌రిచారు.
గతంలో వైఎస్ జయంతి సందర్భంగా రిపీటైన సీనే అయినా కూడా ఈసారి అయినా కలుస్తారేమోనన్న ఆశతో వైఎస్ అభిమానులు ఉన్నారు. కాని అది జ‌ర‌గ‌లేదు.మీడియాతో మాట్లాడుతున్న సమయంలో పార్టీ విలీనంపై విలేకరులు అడిగిన ప్రశ్నకు సమాధానం ఇచ్చారు. వైఎస్సార్టీపీ పార్టీ విలీనంపై మాట్లాడేందుకు ఇది వేదిక కాదని తెలిపారు. 14 ఏళ్ళైనా ప్రజల గుండెల్లో వైఎస్ఆర్ ఇంకాబ్రతికే ఉన్నారన్నారు. వైఎస్ అద్భుతమైన పధకాలు ద్వారా కోట్లమంది ప్రజల గుండెల్లో ఉన్నారని తెలిపారు. రైతు పక్షపాతిగా ఉండి విద్యుత్ బకాయిలను మాఫీచేసి, ఉచిత విద్యుత్‌పై తొలి సంతకం చేసిన మహానేత అంటూ కొనియాడారు. మహిళలకు పావలా వడ్డీ ద్వారా ఎన్నో కుటుంబాలలో వెలుగు నింపారన్నారు.
పేద విద్యార్దులకు ఏ చదువు చదవడానికైనా ఫీజ్ రీఏంబర్స్‌మెంట్ పెట్టారన్నారు. 108, ఆరోగ్యశ్రీ ద్వారా ఎంతో మంది ప్రాణాలు నిలిపారన్నారు. కుల మతాలకు, పార్టీలకు అతీతంగా పధకాలు అందించారన్నారు. వైఎస్సార్ చనిపోయినప్పుడు ఆ బాధ తట్టుకోలేక 700 మంది గుండె ఆగిందన్నారు. వారి కుటుంబాలకు కూడా ప్రగాఢ సంతాపం తెలియచేస్తూ వైఎస్సార్ బిడ్డగా వారి త్యాగాలు మరిచిపోనని వైఎస్ షర్మిల తెలిపారు.
