Vaishnav Tej : ఈ సారి ఏపీ ఎన్నిక‌లు మ‌రింత రంజుగా మారే అవ‌కాశం ఉంది. కూట‌మినా, లేకుంటే వైసీపీనా అనేది ఇప్పుడు స‌స్పెన్స్ గా మారింది. ఇదే త‌రుణంలో పిఠాపురం నుండి పోటీ చేస్తున్న పవన్ క‌ల్యాణ్‌ని గెలిపించాల‌ని కూడా చాలా మంది భావిస్తున్నారు.తనతో కలిపి 21 అసెంబ్లీ, 2 లోక్ సభ నియోజకవర్గాల్లో జనసేన అభ్యర్థుల్ని బరిలో దింపిన పవన్.. త‌న ఫ్యామిలీకి చెందిన వారిని కూడా ప్ర‌చారంలోకి దింపుతున్నారు. పిఠాపురంలో పవన్ కల్యాణ్ ప్రచారం సరిపోదనుకున్నారో ఏమో.. నాగబాబు కూడా అక్కడ చెమటోడుస్తున్నారు.
నాగబాబు సతీమణి కూడా మరిది కోసం పిఠాపురంలో ఇంటింటి ప్రచారం చేపట్టారు. అది చాలదన్నట్టు మెగా ఫ్యామిలీ హీరోలను ఒక్కొక్కరినే రంగంలోకి దింపుతున్నారు. నాగబాబు తనయుడు వరుణ్ తేజ్ ఇప్ప‌టికే పిఠాపురంలో ప్రచారం మొదలు పెట్టారు. ఇప్పుడు మరో హీరో ఆయనకు జత కలిశారు. పవన్ కల్యాణ్ మేనల్లుడు వైష్ణవ్ తేజ్ కూడా పిఠాపురంలో ల్యాండ్ అయ్యారు. ఆయన కూడా ప్రచారాన్ని హోరెత్తించారు. వీరికితోడు జబర్దస్త్ టీమ్ కూడా పిఠాపురంలో హడావిడి చేస్తోంది. పిఠాపురంలో తమ్ముడి తరపున చిరంజీవి ప్రచారానికి వస్తారని అంటున్నా.. అది ఎప్పటినుంచి అనేది మాత్రం క్లారిటీ లేదు. అసలు చిరంజీవి వస్తారా లేదా అనేది ఇంకా ఫైనల్ కాలేదు.
మెగాస్టార్ రావాలని జనసైనికులు బలంగా కోరుకుంటున్నారు. ఆయన వస్తేనే కాపు ఓట్లలో కాస్తయినా కదలిక వస్తుందని అనుకుంటున్నారు. వైష్ణవ్ తేజ్ ఈ రోజు మధ్యా హ్నం 3 గంటలకు పిఠాపురం నవఖండ్రవాడ నుంచి రోడ్ షో ప్రారంభించారు. అనంతరం కొత్తపల్లి మండలం కొండెవరం, ఇసుకపల్లి మీ దుగా నాగులాపల్లి, రమణక్కపేట, రామరాఘవపురం, ముమ్మిడివారిపోడులో పవన్‌కు మద్దతుగా ప్రచారం చేస్తారన్నారు. అనంతరం శ్రీరాంపురం నుంచి కోనపాపపేట, శీలంవారిపాలెం మీదుగా మూలపేట సెజ్‌ కాలనీ చేరుకున్నారు.. అక్కడ నుంచి మూలపేట సెంటర్లో రోడ్డుషోలో ప్రసంగించారు. . రామన్నపాలెం, అమీనాబాద్‌ సెంటర్‌ నుంచి యండపల్లి ఎస్సీ పేట, యండపల్లి జంక్షన్‌,కొత్తపల్లి మీదుగా ఉప్పాడ బీచ్‌రోడ్‌ సెంటర్లో రోడ్‌షోలో ప్రచారం నిర్వహించారు.
