Ambati Dance : పవన్ కళ్యాణ్, సాయి తేజ్ ప్ర‌ధాన పాత్ర‌ల‌లో స‌ముద్ర‌ఖని తెర‌కెక్కించిన చిత్రం బ్రో. త‌మిళ మూవీ వినోద‌య సిత్తంకి రీమేక్‌గా తెర‌కెక్కిన ఈ చిత్రం తొలి రోజు మంచి క‌లెక్ష‌న్స్ రాబ‌ట్టింది. అయితే సినిమాకి హిట్ టాక్ ద‌క్క‌గా, అదే స‌మ‌యంలో మూవీ చుట్టూ వివాదం న‌డుస్తుంది. చిత్రంలో వింటేజ్ పవన్ కళ్యాణ్‌ను చూపించడమే కాకుండా పరోక్షంగా ఏపీ సీఎం వై.ఎస్.జగన్, నీటిపారుదల శాఖ మంత్రి అంబటి రాంబాబుపై వేసిన పంచులు, డైలాగులు కూడా పవర్ ఫ్యాన్స్‌ను విపరీతంగా ఆకట్టుకుంటున్నాయి. కాక‌పోతే వైసీపీ నాయ‌కులు మాత్రం దీనిపై ఆగ్ర‌హం వ్య‌క్తం చేస్తున్నారు.
చిత్రంలో అంబంటి రాంబాబు డాన్స్‌ను ఉద్దేశించి సినిమాలో క్రియేట్ చేసిన ఒక సీన్ నిన్న సోషల్ మీడియాలో బాగా వైరల్ అయ్యింది. గతంలో బోగి పండుగ సందర్భంగా సత్తెనపల్లిలో లంబాడి మహిళలతో కలిసి అంబటి రాంబాబు రోడ్డుపై డాన్స్ చేశారు. ఆ డాన్స్‌ను ఎగతాళి చేస్తూ ‘బ్రో’ సినిమాలో ఒక పాటలో చిన్న సీన్ పెట్టారు. రాంబాబు పాత్రను పోలి ఉన్న శ్యాంబాబు పాత్రను కమెడియన్ పృథ్వీ పోషించారు. శ్యాంబాబు వేస్తున్న స్టెప్పులకు టైటన్(పవన్ కళ్యాణ్)కు కోపం వ‌చ్చేసి వెంటనే మ్యూజిక్ ఆపమని శ్యాంబాబుకు టైటన్ క్లాసు పీకుతాడు.
గతంలో అంబటి రాంబాబు డాన్స్ చేసినప్పుడు వేసుకున్న టీషర్ట్‌ను పోలి ఉన్న టీషర్ట్‌నే సినిమాలో పృథ్వీకి వేయడంతో అంద‌రు కూడా రాంబాబుకి గ‌ట్టిగా ఇచ్చాడ‌ని అన్నారు. ఆ స‌య‌యంలో రాంబాబు కూడా స్పందించాడు. పవన్ కళ్యాణ్ రాజకీయంగా తనను ఎదుర్కోలేక.. సినిమాల్లో తనను పోలిన పాత్రను పెట్టి, దూషించి శునకానందం పొందుతున్నారని విమర్శించారు.ఇక ఇదే విష‌యంపై సాయి ధ‌ర‌మ్ తేజ్‌ని రిపోర్ట‌ర్‌ ప్ర‌శ్నించ‌గా, ముందుగా అంబటి డ్యాన్స్ చూసి ఆశ్చ‌ర్య‌పోయారు.ఇద్దరి హెయిర్ స్టైల్ వేరుగా ఉందని, పృథ్వీకి మీసాలు లేవని చెప్పారు. మరోవైపు అంబటి రాంబాబు గారు చాలా బాగా డ్యాన్స్ చేశారని కితాబునిచ్చారు. తాము ఎవరిని కించ‌పరిచేలా అలా పెట్ట‌లేద‌ని చెప్పుకొచ్చారు. మీ కంటికి అలా అనిపిస్తుందేమో కాని మేం అలా చేయ‌లేదు అని అన్నాడు.
