Renu Desai : ప్ర‌స్తుతం ఏపీ రాజ‌కీయాలు ఎంత వాడివేడిగా సాగుతున్నాయో మ‌నం చూస్తూనే ఉన్నాం. అధికార పార్టీ వైఎస్ఆర్‌సీపీ, ప్రతిపక్ష పార్టీలు టీడీపీ, జనసేన, బీజేపీ వ్యూహ ప్రతివ్యూహాలతో ముందుకుపోతున్నాయి. ఈ తరుణంలో వ్యక్తిగత విమర్శలు కూడా దారుణంగా చేసుకుంటున్నారు. ముఖ్యంగా పవన్ కళ్యాణ్ మూడు పెళ్లిళ్ల విష‌యంతో ఆయ‌న‌ని మ‌రింత డౌన్ చేసే ప్ర‌య‌త్నం చేస్తున్నారు వైసీపీ నేతలు. పవన్ కళ్యాణ్ బ్రో సినిమాలో అంబ‌టిపై సెటైర్ వేయ‌గా, ఆయ‌న పవన్ కళ్యాణ్ పెళ్లిళ్ల గురించి వెబ్ సిరీస్ తీస్తానంటూ ప్ర‌క‌టించాడు. ఈ క్ర‌మంలో రేణూ దేశాయ్ ఓ వీడియో విడుద‌ల చేసింది.
రాజకీయాల్లోకి తనను, తన పిల్లలను లాగొద్దని విజ్ఞప్తి చేసింది. తన మాజీ భర్త, తనకు సంబంధించిన అంశాలతో సినిమా, ఓటీటీ సీరిస్‌లు తీస్తామంటున్నారని.. అది కరెక్ట్ కాదంటూ సూచించారు. రాజకీయాల్లో విమర్శలు సహజం.. కానీ పిల్లలను, మహిళలను లాగకండి అంటూ పేర్కొన్నారు. తన పిల్లలే కాదు, ఏ రాజకీయ నాయకుడి పిల్లలను లాగడం మంచిది కాదంటూ సూచించారు. మా పిల్లలు ఇంకా చిన్న పిల్లలు.. పవన్ కల్యాణ్ డబ్బు మనిషి కాదు.. నా వ్యక్తిగత జీవితాన్ని బయటకు తీసుకురావొద్దంటూ సూచించారు. అంతటితో ఆగకుండా రేణు దేశాయ్ పవన్ కల్యాణ్ పై కూడా పలు కీలక వ్యాఖ్యలు చేశారు.
నా విష‌యంలో మాజీ భర్త (పవన్) చేసింది ముమ్మాటికి తప్పేనని.. కానీ దాన్ని రాజకీయాల్లోకి తీసుకురావొద్దని రేణుదేశాయ్‌ సూచించారు. పవన్ కల్యాణ్ ఆశయాలు గొప్పవి.. పవన్ డబ్బు మనిషి కాదు.. పవన్ కు ఒక్క అవకాశం ఇవ్వండి.. ప్రజల కోసం పవన్ పనిచేయాలన్న తపన గొప్పది.. అంటూ రేణు దేశాయ్ చెప్పుకొచ్చారు. అయితే రేణూ వీడియో విడుద‌ల చేసిన వెంట‌నే అంబటి .. ‘అమ్మా రేణూ! మీ మాజీకి చెప్పు.. మా క్యారెక్టర్లు పెట్టి శునకానందం పొందొద్దని!’ అని ట్వీట్ చేశారు. మంత్రి బ్రో మూవీలో శ్యాంబాబు క్యారెక్టర్‌ను ప్రస్తావించారు. తమలాంటి క్యారెక్టర్లను సినిమాల్లో పెట్టి శునకానందం పెట్టొద్దని పవన్ కళ్యాణ్‌కు చెప్పాలంటూ రేణూను రిక్వెస్ట్ చేస్తూ మంత్రి అంబటి రాంబాబు ఒకింత సెటైర్లు పేల్చారు.
