Natu Natu Song : ఇటీవ‌ల ఆస్కార్ గెలుచుకున్న నాటు నాటు పాట‌కి ఉన్న క్రేజ్ గురించి ప్ర‌త్యేకంగా చెప్ప‌న‌క్క‌ర్లేదు. సినిమా రిలీజ్ కి ముందే సెన్సేష‌న్ క్రియేట్ చేసిన ఈ పాట ఇక ఆస్కార్ ద‌క్కించుకున్న త‌ర్వాత ప్రపంచ వ్యాప్తంగా ఫుల్ పాపుల‌ర్ అయింది. ప్ర‌తి ఒక్క‌రు ఈ పాట‌కి కాలు క‌దిపే ప్ర‌య‌త్నం చేస్తున్నారు. కొద్ది రోజుల క్రితం హ‌ర్భ‌జ‌న్-రైనా కలిసి ఈ పాట‌కి గ్రౌండ్‌లో స్టెప్పులు వేయ‌గా, ఇక రీసెంట్‌గా విరాట్ కోహ్లీ కూడా కాలు క‌దిపాడు. ఆస్ట్రేలియాతో జ‌రిగిన తొలి వ‌న్డేలో టీమిండియా ఫీల్డింగ్ సందర్భంగా స్లిప్‌లో ఫీల్డింగ్ చేసిన విరాట్ కోహ్లీ.. నాటు నాటు స్టెప్పులేయడం టీవీ కెమెరాల్లో కనిపించింది.
ఈ వీడియోను అభిమానులు సోషల్ మీడియా వేదికగా పంచుకోగా.. దీనికి ట్రిపుల్ ఆర్ టీమ్ స్పందించింది. విరాట్ కోహ్లీ ట్యాగ్ చేస్తూ లవ్ ఎమోజీలతో రీట్వీట్ చేసింది. ట్విటర్‌లో కాపీరైట్ కారణంగా ఈ వీడియో డిలీట్ అవ్వగా.. ఇన్‌స్టాలో ఆర్ఆర్ఆర్ టీమ్ పంచుకుంది. కోహ్లీ నాటు నాటు స్టెప్పులకు సంబంధించిన వీడియో అభిమానులను తెగ ఆకట్టుకుంటుంది. బోర్డర్ గవాస్కర్ టెస్టు సిరీస్ సమయంలో ఆల్‌రౌండర్ రవీంద్ర జడేజాతో కలిసి షారుక్ ఖాన్ లేటెస్ట్ బ్లాక్ బస్టర్ ‘పఠాన్’ పాటకు స్టెప్పులు వేసి అల‌రించాడు విరాట్ కోహ్లీ.
ట్రెండింగ్ సాంగ్స్‌కు విరాట్ కోహ్లీ డ్యాన్స్ చేయడం గ‌తంలోను చూశాం. అయితే ఆర్ఆర్ఆర్ చిత్రం మాత్రం ప్ర‌తి భారతీయుడు గ‌ర్వ‌ప‌డేలా చేసింద‌ని చెప్పాలి. టాలీవుడ్ దర్శక ధీరుడు ఎస్ఎస్ రాజమౌళి తెరెక్కించిన ఆర్ఆర్ఆర్ మూవీ గతేడాది విడుదలై అఖండ విజయం సాధించింది. టాలీవుడ్ టాప్ హీరోలు ఎన్టీఆర్, రామ్ చరణ్ ప్రధాన పాత్రల్లో నటించగా.. ఆలియా భట్, అజయ్ దేవగణ్ కీలక పాత్ర పోషించారు. ఈ సినిమాలోని ‘నాటు నాటు’ పాట, ‘బెస్ట్ ఒరిజినల్ సాంగ్’ కేటగిరిలో ‘ఆస్కార్’ అవార్డు అందుకోగా, ఈ కేటగిరిలో ఆస్కార్ గెలిచిన మొట్టమొదటి భారతీయ సినిమాగా ట్రిపుల్ ఆర్ సరికొత్త రికార్డు సృష్టించింది.
View this post on Instagram
