Nagarjuna : బిగ్ బాస్ సోహెల్, రూప హీరోహీరోయిన్లుగా వస్తున్న ‘మిస్టర్ ప్రెగ్నెంట్’ ట్రైలర్ లాంచ్ ఈవెంట్ హైదరాబాద్‌లోని దసపల్లా హోటల్‌లో శనివారం సాయంత్రం జరిగింది. ఈ ట్రైలర్ లాంచ్ ఈవెంట్‌లో అక్కినేని నాగార్జున ముఖ్య అతిథిగా పాల్గొని చిత్ర యూనిట్‌కు శుభాకాంక్షలు తెలియజేశారు. అంతేకాదు నాగార్జున మైక్ అందుకున్న‌ప్పుడు ఆయ‌న‌ని యాంక‌ర్ మంజుల ఓ ప్ర‌శ్న అడిగింది. ‘ఆగస్టు 18న డెలివరీ కాబోతోంది కాబట్టి.. మగబిడ్డ పుడతాడా? ఆడబిడ్డ పుడుతుందా? పుట్టే బిడ్డకు ఏం పేరు పెడతారు?’ అని కింగ్‌ను మంజూష ప్రశ్నించారు.
వెంటనే నాగార్జున.. ‘ఎవరికి’ అని పంచ్ వేశారు. అంటే డెలివరీ ఎవరికి అని. వెంటనే.. ‘మిస్టర్ ప్రెగ్నెంట్‌కి సార్’ అని మంజూష సమాధానం ఇచ్చారు. దీంతో అక్కడ నవ్వులు పూసాయి. అయితే, ‘మిస్టర్ ప్రెగ్నెంట్‌కి హిట్టు పుట్టాలి’ అని నాగార్జున అన్నారు. అంటే, సినిమా మంచి విజయం సాధించాలని ఆకాంక్షించారు. ఇక తన జీవితంలో అత్యద్భుతమైన క్షణాల్ని ప్రేక్షకులతో పంచుకున్నాడు హీరో నాగార్జున. అఖిల్, అమల గర్భంలో ఉన్నప్పుడు ఆమెకు తోడుగా గడిపిన క్షణాల్ని జీవితంలో మరిచిపోలేనన్నాడు. దాదాపు 30 ఏళ్ల కిందటి ఆ జ్ఞాపకాల్ని బయటపెట్టాడు. “హలో బ్రదర్ షూటింగ్ అప్పుడే పూర్తయింది. అమల 9 నెలల గర్భంలో చివరి 6 నెలలు అమలకే కేటాయించాను. ప్రతి నిమిషం ఆమెతోనే ఉన్నాను. చివరికి డెలివరీ రూమ్ లో కూడా అమల చేయి పట్టుకొనే ఉన్నాను. నా జీవితంలో అది ఓ అరుదైన గొప్ప అనుభవం.”
ఇలా అఖిల్ పుట్టినప్పటి జ్ఞాపకాల్ని నెమరువేసుకున్నాడు నాగ్. అమ్మతనం అనేది గొప్ప వరమని, ఆ టైమ్ లో వాళ్లకు అండగా ఉండడం అవసరం అన్నాడు. అయితే పురుషుడు గర్భం దాల్చడం అనే కొత్త కాన్సెప్ట్ తో మిస్టర్ ప్రెగ్నెంట్ సినిమా వస్తుందని తెలుసుకొని ఆశ్చర్యం వ్యక్తం చేశాడు నాగ్. ఈ సినిమాకు సంబంధించి ఏడాదిన్నర కిందటే 10 నిమిషాల వీడియో చూశాడట. సినిమా కూడా చూస్తానని అప్పుడే మాటిచ్చాడట. మొత్తానికి తన అభిమాని మూవీ ప్రీ రిలీజ్ ఈవెంట్ కి నాగార్జున హాజ‌రై సంద‌డి చేయ‌డం విశేషం.
