New House : ప్ర‌తి ఒక్క‌రికి సొంతింటి కల ఉంటుంది. ఆ కల నెరవేర్చుకునేందుకు ప్ర‌తి ఒక్క‌రు చాలా క‌ష్ట‌ప‌డుతుంటారు. అయితే సొంతింటి కలను నెరవేర్చుకునేందుకు కేంద్ర ప్రభుత్వం కీలక నిర్ణయం తీసుకుంది. తక్కువ వడ్డీకి బ్యాంక్ నుంచి హోం లోన్స్ అందించే దిశగా ప్రణాళికలు సిద్ధం చేస్తోంది. సొంతింటి కల కోసం . డబ్బుల్ని ఏళ్లుగా పొదుపు చేస్తుంటారు. అయినా ఇంటి నిర్మాణానికి లేదా కొనుగోలు చేసేందుకు అది సరిపోదు. ఇంకా అప్పులు చేయాల్సి వస్తుంది. బ్యాంక్ లోన్స్ తీసుకోవాల్సి వస్తుంది. ఇటీవలి కాలంలో బ్యాంకుల్లో హోం లోన్స్‌పై వడ్డీ రేట్లు భారీగా పెరిగాయి. దీంతో వారి సొంతింటి కల కష్టంగా మారింది.
అయితే అలాంటి వారికి సరసమైన హోం లోన్స్ వడ్డీ రాయితీ పథకాన్ని కేంద్రం త్వరలో ప్రారంభించనున్నట్లు తెలుస్తోంది. ఈ మేరకు కేంద్ర గృహ నిర్మాణ, పట్టణ వ్యవహారాల శాఖ మంత్రి హర్‌దీప్ సింగ్ పూరి వెల్లడించారు. రానున్న కొద్దిరోజుల్లోనే కేంద్రం దీనిని ప్రకటించే అవకాశాలు ఉన్నాయని చెప్పుకొచ్చారు. దీపావళి లోపు ఇది అమల్లోకి రానున్నట్లు సమాచారం. రానున్న 5 సంవత్సరాలలో చిన్న పట్టణ గృహాలకు సబ్సిడీ లోన్స్ అందించేందుకు కేంద్రం.. రూ. 60 వేల కోట్లు వెచ్చించనున్నట్లు తెలుస్తోంది. ఇప్పుడు 5 రాష్ట్రాల్లో అసెంబ్లీ ఎన్నికలు, వచ్చే ఏడాది సాధారణ ఎన్నికల నేపథ్యంలో ఈ స్కీం త్వరలోనే అమలయ్యే అవకాశాలు కనిపిస్తున్నట్లు తెలుస్తోంది.
2023 స్వాతంత్య్ర దినోత్సవం ప్రసంగంలో ప్రధాని నరేంద్ర మోదీ.. కొత్త స్కీం ద్వారా నగరాల్లో అద్దె ఇళ్లలో నివసించే వారికి తక్కువ వడ్డీకే హోం లోన్స్ అందిస్తామని ఎర్రకోట వేదికగా ప్రకటించారు. తమ ప్రభుత్వం కొత్త పథకం తీసుకొస్తుందని చెప్పారు. ఇక ఈ స్కీం రూ. 9 లక్షల వరకు హోం లోన్లపై 3 నుంచి 6.5 శాతం మధ్య వార్షిక వడ్డీ రాయితీ ఇస్తుందని పలు మీడియాల్లో కథనాలు వచ్చాయి. ఇక ఈ రాయితీ అనేది 20 ఏళ్ల కాలవ్యవధికి తీసుకున్న రూ. 50 లక్షల కంటే తక్కువ హోం లోన్లపై అందుబాటులో ఉండకపోవచ్చని తెలుస్తోంది. ఈ స్కీం విధివిధానాలు రూపొందిస్తున్నట్లు.. దాదాపు తుదిదశకు చేరాయని.. త్వరలోనే ప్రకటన ఉండే అవకాశం ఉందని ఇటీవల కేంద్ర మంత్రి పూరి చెప్పుకొచ్చారు.
