ఓటీటీలో ఆక‌ట్టుకుంటున్న ఏటీఎం వెబ్ సిరీస్‌.. ఎందులో ఉంది అంటే..?

టాలీవుడ్ ప్రముఖ దర్శకుడు హరీష్ శంకర్ కథతో, బిగ్ బాస్ ఫేమ్ వీజే సన్నీ నటించిన ఏటీఎం వెబ్ సిరీస్ జీ లో స్ట్రీమింగ్ అవుతున్న విష‌యం తెలిసిందే. ఇందులో సుబ్బరాజు, 30 ఇయర్స్ పృథ్వీ, కృష్ణ బూరుగుల, రవిరాజ్, రాయల్ శ్రీ, బిగ్‌బాస్ దివి, దివ్యవాణి, షఫీ, హర్షిణి తదితరులు ముఖ్య పాత్ర‌లు పోషించారు. జీ5 వేదికగా జనవరి 20(శుక్రవారం) నుంచి స్ట్రీమింగ్ అవుతున్న ఈ సిరీస్‌కు చంద్రమోహన్ సీ దర్శకత్వం వహించారు. దిల్ రాజు బ్యానర్‌లో తెరెకెక్కిన ఈ సిరీస్‌కు హర్షిత్ రెడ్డి, హన్షిత నిర్మాతలుగా వ్యవహరించగా, ఇది ఎలా ఉందో చూద్దాం.

హైదరాబాద్‌లోని మురికివాడలకు చెందిన జగన్ (విజె సన్నీ), కార్తీక్ (కృష్ణ బూరుగుల), హర్ష (రోయల్ శ్రీ), అభయ్ (రవి రాజ్) లు బ్రతుకు తెరువు కోసం చిన్నచిన్న దొంగతనాలు చేస్తుంటారు. ఓ రోజు 10 కోట్ల రూపాయల విలువైన వజ్రాలు ఉన్న కారును దొంగిలించి దానిని ఎవరికో అమ్మేశారు. వజ్రాల యజమాని వారిని కొట్టిన తర్వాత, 10 రోజుల్లో 10 కోట్ల రూపాయలు తిరిగి ఇస్తానని డీల్ ప్రతిపాదించాడు. జగన్, అతని స్నేహితులు 25 కోట్ల రూపాయల ఉన్న ఏటీఎం వ్యాన్‌ ను దొంగిలిస్తారు. హెగ్డే (సుబ్బరాజు), క్రూరమైన ఏసీపీ ఈ కేసును ద‌ర్యాప్తు చేయ‌డానికి నగరానికి వస్తాడు.అతని రాక త‌ర్వాత కేసు ఎలాంటి మ‌లుపులు తిరుగుతుంది. హెగ్డే దొంగలను పట్టుకుని దోచుకున్న డబ్బును రికవరీ చేశారా? అనేది ఈ వెబ్ సిరీస్ చూస్తే తెలుస్తుంది.

కథ చదివితే కామన్‌గా వార్తల్లో చూసే తంతే అనిపిస్తుంది.. కానీ, దీనికి హరీష్ శంకర్ హ్యూమర్, సస్పెన్స్ యాడ్ చేశారు. అక్కడక్కడా ఫిలాసఫీ చెప్పారు. ఏటీఎం దొంగతనాలు, కోట్లకు కోట్లు పోసి ఎమ్మెల్యే టికెట్ కొనుక్కోవడం, బస్తీలో యువకుల జీవితాలు… కొత్త ఏమీ కాదు. నిత్యం వార్తల్లో చూసేవే. స్క్రీన్ మీదకు వచ్చినవే. వీటన్నిటినీ ఓ ప్యాకేజ్ రూపంలో ప్రేక్షకుల ముందుకు తీసుకొచ్చి మెప్పించాడు హరీష్ శంకర్. కొన్ని ఎపిసోడ్స్‌ లో ప్రేక్షకులను కట్టి పడేసేలా సీరియస్ మూడ్‌ని క్రియేట్ చేయడంలో దర్శకుడు చంద్రమోహన్ సక్సెస్ అయ్యాడు. ఇక ఇందులో మొదటి నాలుగు ఎపిసోడ్‌లు స్లో పేస్‌లో నడుస్తాయి, విసుగు తెప్పిస్తాయి. తరువాతి ఎపిసోడ్స్ చక్కగా ఉన్నాయి. కానీ గ్రిప్పింగ్ స్క్రీన్‌ప్లే ఏటిఎం ని ఆకర్షణీయమైన హీస్ట్ థ్రిల్లర్‌గా మార్చే అవకాశం ఉంది.