Allu Arjun : గంగోత్రి సినిమాతో వెండితెర ఆరంగేట్రం చేసిన హీరో అల్లు అర్జున్. ఈ సినిమా చూసిన‌ప్పుడు అల్లు అర్జున్ ఓ రేంజ్ హీరో కూడా కావ‌డం క‌ష్ట‌మే అని అంద‌రు అనుకున్నారు. కానీ ఇప్పుడు అంద‌రి అంచ‌నాల‌ను త‌ల‌కిందులు చేస్తూ పాన్ ఇండియా స్టార్‌గా మారాడు. గ‌త ఏడాది విడుద‌లైన పుష్ప సినిమాతో బ‌న్నీ తెలుగులోనే కాకుండా ఇత‌ర భాష‌ల‌లోను అశేష ఆద‌ర‌ణ పొందాడు. ఇక బ‌న్నీ న‌టిస్తున్న పుష్ప 2 సినిమా కోసం అంద‌రూ ఆస‌క్తిగా ఎదురు చూస్తున్నారు. పార్ట్ 2లో అల్లు అర్జున్ ఎలాంటి లుక్ లో కనిపించబోతున్నారనేది ఆసక్తికరంగా మారింది.
సీక్వెల్‌లో అల్లు అర్జున్ కాస్త డిఫరెంట్ లుక్ లో కనిపించనున్నారని తెలుస్తోంది. ఇందుకోసం బాలీవుడ్ ప్రముఖ మేకప్ ఆర్టిస్ట్ ప్రీతి షీల్ అల్లు అర్జున్ కు మేకప్ చేస్తుంద‌ట. ఈ మేకప్ టెస్ట్ లో పుష్ఫ రాజ్ రఫ్ లుక్ నుంచి కాస్త భిన్నమైన లుక్ లో కనిపించారని తెలుస్తోంది. ఈ నెల 22 నుండి ఈ చిత్రం రెగ్యూలర్ షూటింగ్ జ‌ర‌గ‌నున్న‌ట్టు తెలుస్తుంది. అయితే సినిమా సినిమాకు త‌న రేంజ్ పెంచుకుంటూ పోయిన అల్లు అర్జున్ పారితోషికం విష‌యంలోనూ త‌గ్గేదే లే అన్న‌ట్టుగా దూసుకు పోతున్న‌ట్టు తెలుస్తుంది.
ఇప్ప‌టివ‌ర‌కు ఇండియ‌న్ సినిమా హిస్టరీలోనే రూ.125 కోట్ల పారితోషికం ఒకే సినిమాకి తీసుకుంటున్న హీరో స‌ల్మాన్ ఖాన్ కాగా ఇప్పుడు అదే పారితోషికం అందుకుంటున్న హీరోగా అల్లు అర్జున్ నిలిచిన‌ట్టు చెబుతున్నారు. ఒక‌వేళ ఇదే నిజ‌మైతే మాత్రం సౌత్‌లో రూ.125 కోట్ల పారితోషికం అందుకునే తొలి హీరోగా అల్లు అర్జున్ స‌రికొత్త చ‌రిత్ర లిఖించిన‌ట్టు అవుతుంద‌ని బ‌న్నీ ఫ్యాన్స్ తెగ హంగామా చేస్తున్నారు. రీసెంట్‌గా బెంగుళూరులో జరిగిన సైమా అవార్డ్స్ వేడుకలో పుష్ప స్టార్స్ సందడి చేశారు. బెస్ట్ యాక్టర్‌గా అల్లు అర్జున్ అవార్డు అందుకున్నాడు. అంతేకాదు మరో ఐదు కేటగిరిల్లో కూడా పుష్ప సినిమాకు అవార్డులు ద‌క్కాయి.
