డార్లింగ్ ప్ర‌భాస్‌కి ఈ ఏడాది పెద్ద‌గా క‌లిసి రావ‌డం లేదు. ఆయ‌న నటించిన రాధే శ్యామ్ ఇదే ఏడాది విడుదల కాగా,ఈ చిత్రం దారుణంగా నిరాశ‌ప‌ర‌చింది. మరోవైపు తన ప్రాణానికి ప్రాణమైన పెదనాన్న కృష్ణంరాజు క‌న్నుమూసారు. ఆ బాధ నుండి ఇప్ప‌టికీ బ‌య‌ట‌కు రాలేక‌పోతున్నారు. మరోవైపు ప్రభాస్ హీరోగా నటించిన సినిమాలు వాయిదాలు ప‌డ‌డం. రామయణం ఆధారంగా రూపొందుతున్న ‘ఆదిపురుష్’ చిత్రాన్ని వచ్చే యేడాది జనవరి 12 న విడుదల చేస్తున్నట్టు ప్రకటించారు. కాని ఈ మూవీ వాయిదా ప‌డ‌నుంద‌ని తెలుస్తుంది. మ‌రో వైపు ప్రభాస్ స‌లార్ చిత్రం కూడా చెప్పిన టైంకి రాలేక‌పోవ‌చ్చ‌నే కామెంట్స్ వినిపిస్తున్నాయి.
కొద్ది రోజుల క్రితం ఆదిపురుష్ చిత్ర టీజ‌ర్ విడుదల కాగా, ఇందులోని స‌న్నివేశాలు నాసిక‌రంగా ఉన్నాయి. చిన్న పిల్ల‌ల గేమ్‌లా అని చాలా మంది పెద‌వి విరిచారు. తెలుగు వెర్షన్ తీసుకోవాలనుకున్న యువి సంస్థ కూడా ఆందోళనకు గురయినట్లు తెలుస్తోంది. ప్రభాస్ కూడా సిజి వర్క్ విషయంలో దర్శకుడు ఓం రౌత్ కు గట్టి క్లాస్ పీకినట్లు బోగట్టా. ఆ విషయంలో తనదీ భరోసా అని దర్శకుడు ప్రభాస్ కు హామీ ఇచ్చినట్లు తెలుస్తోంది. సిజి వర్క్ లు పూర్తిగా చూసి, సంతృప్తి చెందిన తరువాతే విడుదలకు వెళ్తారని ప్ర‌చారాలు న‌డుస్తున్నాయి.
వీఎఫ్‌ఎక్స్ వర్క్ మ‌ళ్లీ చేయడానికి మేకర్స్ భారీ రూ. 100 కోట్లు వెచ్చిస్తున్నట్లు కూడా సమాచారం. రామ్ (ప్రభాస్), రావణ (సైఫ్) నటించిన కొంత భాగాన్ని రీషూట్ చేస్తారని కూడా వినిపిస్తోంది. మరికొన్ని క్యారెక్టర్ లుక్స్ డిజిటల్ రీక్రియేట్ కూడా చేయోచ్చ‌ట. ప్రస్తుతానికి ఆదిపురుష్ చిత్రానికి సంబంధించి ఎన్నో ప్ర‌చారాలు న‌డుస్తున్నాయి. ఇందులో ఎంత నిజం ఉందో తెలియ‌క అభిమానులు క‌న్ఫ్యూజ్ అవుతున్నారు. జనవరి 12న బడా హీరోల చిత్రాలతో పాటు.. ఒకేసారి అనేక సినిమాలు విడుదలవుతున్న క్రమంలో ఆదిపురుష్ చిత్రాన్ని వాయిదా వేయాలని భావిస్తున్నారట మేకర్స్. దీనిపై త్వరలోనే అధికారిక ప్రకటన చేయనున్నారనే టాక్ కూడా వినిపిస్తుంది.
