Chinmayi : సింగర్, డ‌బ్బింగ్ ఆర్టిస్ట్ చిన్మయి గురించి ప్ర‌త్యేకంగా చెప్ప‌న‌క్క‌ర్లేదు. సమంతకి వాయిస్ ఇచ్చి మరింత పాపులర్ అయింది చిన్మయి. నటుడు, దర్శకుడు రాహుల్ రామకృష్ణని పెళ్లి చేసుకున్న చిన్మయి ఇటీవలే కవల పిల్లలకి కూడా జన్మనిచ్చి వార్త‌ల‌లోకి ఎక్కింది. ఈ అమ్మ‌డు కాస్టింగ్ కౌచ్ తర్వాత నిత్యం వార్త‌ల‌లో నిలుస్తుంది. ఏదో ఒక విష‌యంపై స్పందిస్తూ హాట్ టాపిక్ గా మారుతుంది. రెగ్యులర్ గా సోషల్ మీడియాలో ఏదో ఒకదానిపై సంచలనంగా పోస్టులు చేస్తూ ఉంటుంది. అయితే తమిళ సినీ నిర్మాత, రచయిత వైరముత్తు పేరు చెబితేనే చిన్మయి ఉప్పెనలా ఎగిసిప‌డుతుంది.
తాజాగా వైరముత్తుపై సింగర్ చిన్మయి మరోసారి తీవ్ర వ్యాఖ్యలు చేశారు. తొలుత ఆయన మంచి వ్యక్తిగానే కనిపిస్తారని, ఆ తర్వాత అసలు స్వరూపాన్ని ప్రదర్శిస్తారని, ఇబ్బందులకు గురి చేస్తారని చెప్పుకొచ్చింది.. ఆయన గురించి తమిళ యువనటి అర్చనకు ఈ మేరకు సూచించారు. ఇటీవల వైరముత్తును అర్చన కల‌వ‌డంతో పాటు, ఆయనతో దిగిన ఫొటోను సోషల్ మీడియాలో షేర్ చేసింది. గొప్ప రచయిత వైరముత్తును కలిశానని, ఎంతో సంతోషంగా ఉందని ఆమె తెలిపింది. ఈ నేపథ్యంలో చిన్మయి స్పందిస్తూ, ఇలాగే మొదలవుతుందని, ఆయనతో జాగ్రత్తగా ఉండాలని అర్చనకు సూచించింది.
వీలైనంత వరకు ఆయనకు దూరంగా ఉండాలని, నీ పక్కన వేరే వ్యక్తులు లేకుండా ఒక్కదానివే వెళ్లకు అని హెచ్చ‌రించింది.. అతనికి ఎంత దూరంగా ఉంటే అంత మంచిది, అతన్ని కలవకపోవడమే బెటర్ అంటూ చిన్మయి స్ట‌న్నింగ్ కామెంట్స్ చేసింది. అయితే విదేశాలలో ప్రోగ్రామ్ కోసం వెళ్లినప్పుడు వైరముత్తు తనను వేధింపులకు గురి చేశాడని మీటూ వేదికగా చిన్మయి గతంలో ఆరోపించిన సంగతి తెలిసిందే. కాగా, మహిళలపై జరిగే వేధింపుల విషయంలో చిన్మయి ఫైర్ బ్రాండ్ గా మారిపోయింది. మీటూ ఉద్యమంలో భాగంగా చిన్మయి తరచుగా తన గళం వినిపిస్తూనే ఉంది. మహిళలని అవమానించేలా చిన్న సంఘటన జరిగినా వెంట‌నే స్పందిస్తూ ఉంటుంది. మీటూ ఉద్యమం చెలరేగినప్పుడు చిన్మయి తమిళ లిరిసిస్ట్ వైరముత్తుపై తీవ్రమైన వ్యాఖ్యలు చేసి హాట్ టాపిక్‌గా నిలిచింది.
