Rishabh Pant : న్యూజిలాండ్ తో మూడు టీ20ల సిరీస్ లో భాగంగా ఆదివారం మౌంట్ మాంగనుయ్ లో మొదలైన రెండో మ్యాచ్ లో టాస్ ఓడిన భారత్ మొదట బ్యాటింగ్ కు వచ్చింది. కెప్టెన్ హార్దిక్ పాండ్యా.. ఎడమచేతి వాటం బ్యాటర్లు, కీపర్లు అయిన ఇషాన్ కిషన్, రిషబ్ పంత్ లను ఓపెనర్లుగా పంపించాడు. అయితే యువ బ్యాటర్ ఇషాన్ కిషన్ ఆకట్టుకోగా.. సీనియర్ అయిన పంత్ మాత్రం నిరాశపరిచాడు. వరుస వైఫల్యాలతో ఫ్యాన్స్ నుంచిసైతం విమర్శలు ఎదుర్కొంటున్న పంత్ ఈ మ్యాచ్‌లో రాణిస్తాడని అందరూ భావించారు. కానీ పంత్ కొద్దికాలంగా పేలవ బ్యాటింగ్‌తో క్రికెట్ అభిమానులను నిరాశపరుస్తున్నాడు.
ఈ ఏడాది రిషబ్ పంత్ టెస్టులు మరియు వన్డే ఇంటర్నేషనల్స్‌లో బ్యాటింగ్ చేస్తున్నప్పుడు అద్భుతమైన టచ్‌లో కనిపించాడు. కానీ టీ20ల్లో తన అద్భుతమైన పవర్-హిట్టింగ్ టెక్నిక్‌లతో ప్రభావం చూపలేకపోయాడు. ఇటీవల ఆస్ట్రేలియాలో జరిగన వరల్డ్ కప్ లోనూ వచ్చిన అవకాశాన్ని సద్వినియోగం చేసుకోలేక పోయాడు. అయినా టీమిండియా సెలక్టర్లు పంత్ పై నమ్మకం ఉంచి న్యూజిలాండ్ పర్యటనలో టీ20, వన్డే జట్లకు వైస్ కెప్టెన్‌గా ఎంపిక చేశారు. పంత్ ను ఓపెనర్ గా పంపిస్తే రాణిస్తాడని పలువురు మాజీ క్రికెటర్లు సూచించారు. వారి సూచనల మేరకే పంత్ ఓపెనర్ గా బరిలోకి దిగి విఫలమయ్యాడు.
తాజాగా జరిగే మ్యాచ్‌లో ఓపెనర్ గా బ్యాటింగ్ ప్రారంభించిన పంత్.. 13 బంతులు ఎదుర్కొని కేవలం 6 పరుగులు మాత్రమే చేశాడు. ఫెర్గూసన్ బౌలింగ్ లో సౌథీకి క్యాచ్ ఇచ్చి పెవిలియన్ బాట పట్టాడు. పంత్ నిర్లక్ష్యపు ఆటతో తీరుతో ఫ్యాన్స్ మండిపడుతున్నారు. ఇంకా ఎన్ని అవకాశాలు ఇవ్వాలి, ఇలా ఆడుతుంటే టీమిండియా కెప్టెన్ చేయాలంటా అంటూ వ్యంగ్యంగా కామెంట్లు చేస్తున్నారు. పంత్ ఆటతీరు అంతర్జాతీయ ట్రయల్ మ్యాచ్ ఆడుతున్నట్లు ఉంది అంటూనే.. ఇలా అయితే ఇకముందు పంత్ టీమిండియా జట్టులో చూడటం కష్టమని సోషల్ మీడియాలో కామెంట్స్ చేస్తున్నారు. ఇక పంత్ అంటే పడనివారు తాజాగా అతని బ్యాటింగ్ తీరుపై విమర్శల డోస్ ను మరింత పెంచారు.
