Fahadh Faasil : అల్లు అర్జున్ ప్ర‌ధాన పాత్ర‌లో రూపొందిన సూప‌ర్ హిట్ చిత్రం పుష్ప. ఈ సినిమా విడుద‌లై ఎంత పెద్ద విజ‌యం సాధించిందో మ‌నం చూశాం. ఇందులో విల‌న్‌గా న‌టించారు ఫహాద్ ఫాజిల్. ఆయ‌న స్వతహాగా మలయాళ నటుడు. నిర్మాతగానూ పలు సినిమాలు తీసి విజ‌యాల‌ను సొంతం చేసుకున్నాడు. ఇటీవ‌లే విడుద‌లైన ‘ఆవేశం’ మూవీతో బ్లాక్ బస్టర్ హిట్ కొట్టాడు. మలయాళంలో నిర్మాతగా ఫహాద్ పలు సినిమాలు కూడా చేస్తున్నారు. అయితే ఇటీవ‌ల పింకేలీ సినిమా షూటింగ్‌ను ఓ ప్ర‌భుత్వాసుప‌త్రిలోని ఎమ‌ర్జ‌న్సీ వార్డులో చేశారు. గురువారం రాత్రంతా ఎమ‌ర్జ‌న్సీ వార్డులో షూటింగ్ చేయడంతో అక్కడున్న రోగులు చాలా ఇబ్బంది పడ్డారు.
అత్యవసర విభాగంలో షూట్ కోసం ఎలా అనుమ‌తి ఇచ్చారని చెప్పి ఎర్నాకులం జిల్లా వైద్యాధికారి బీనా కుమారి కూడా చిత్ర యూనిట్‌పై సీరియస్ అయ్యారు. ఏడు రోజుల్లో వివరణ ఇవ్వాలని ఆదేశించారు. అయితే, సినీ నిర్మాతల సంఘం మాత్రం ఈ ఆరోపణల్ని కొట్టిపారేసింది. రాత్రి షూటింగ్ కోసం రూ.10 వేలు చెల్లించామంటూ చెప్పింది.కాక‌పోతే ఆ రోజు రోగులకు చికిత్స జరుగుతుండగా.. మరోవైపు షూటింగ్ జరిగిందని.. దీంతో రోగులు.. వారితోపాటు ఉన్న కుటుంబసభ్యులు చాలా ఇబ్బందులు పడ్డారని వార్త‌లు వ‌చ్చాయి. అత్యవసర చికిత్స అవసరం ఉన్నప్పటికీ పలువురు రోగులను ఎమర్జెన్సీ వార్డులోకి వెళ్లనీయకుండా చిత్రయూనిట్ అడ్డుకున్నారని.. ఆసుపత్రిలో రాత్రంతా నానా హంగామా చేశారని అక్కడున్న రోగులు చెప్పుకొచ్చారు.
అయితే ఈ మొత్తం వ్యవహారాన్ని సుమోటోగా తీసుకున్న కేరళ మానవ హక్కుల సంఘం మాత్రం నిర్మాత ఫహాద్ ఫాజిల్‌పై కేసు పెట్టింది. ఫహాద్ ఫాజిల్ తెలుగులో బ్లాక్ బస్టర్ హిట్ కొట్టిన పుష్ప చిత్రంతో తెలుగులో కూడా మంచి క్రేజ్ సంపాదించుకున్నాడు. మరి ఈ వివాదంపై ఫ‌హ‌ద ఫాజిల్ ఎలా స్పందిస్తాడు అనేది చూడాల్సి ఉంది.
