Ponnavolu : స్కిల్ స్కామ్ కేసులో అరెస్ట్ అయిన చంద్ర‌బాబుకి ఇటీవ‌ల న్యాయ‌స్థానం బెయిల్ ఇచ్చిన విష‌యం తెలిసిందే. చంద్ర‌బాబుకి బెయిల్ రావ‌డంతో తెలుగు తమ్ముళ్లు సంబురాలు చేసుకున్నారు. కాని సీఐడీ తరపున ఏసీబీ కోర్టులో బలమైన వాదనలు వినిపించిన అదనపు అడ్వకేట్ జనరల్ పొన్నవోలు సుధాకర్ రెడ్డి మాత్రం ఆ తీర్పు న్యాయ స‌మ్మ‌త‌మైన‌ది కాదని అన్నారు. హైకోర్టు తీర్పు న్యాయ సమ్మతం, చట్ట సమ్మతం కాదని.. చంద్రబాబుకు హైకోర్టు బెయిల్ ఇవ్వడం దురదృష్టకరం అని ఏపీ అడిషనల్ అడ్వొకేట్ జనరల్ పొన్నవోలు సుధాకర్ రెడ్డి అన్నారు.సీఐడీ వాదనను హైకోర్టు పరిగణలోకి తీసుకోలేదు, అందుకే సుప్రీంకోర్టును ఆశ్రయించాము అని వివరించారు. ఆధారాలు ఉన్నాయని చెప్పినా హైకోర్టు పట్టించుకోకుండా తీర్పు ఇవ్వడం అప్రజాస్వామికం అని ఆయన వ్యాఖ్యానించారు.
ఏపీ స్కిల్ కేసును ఈడీ, సీఐడీ దర్యాప్తు జరుపుతోందని, చార్జిషీట్ వేసినప్పుడు నిజానిజాలు బయటకు వస్తాయని ఆయన అన్నారు. సాక్ష్యాలు ఆధారాలు ట్రయల్ కోర్టు దగ్గర ఉంటాయని వెల్లడించారు. హైకోర్టు తన పరిధి దాటి వ్యవహరించింది అని కామెంట్ చేశారు. ముఖ్యమంత్రిగా నిర్ణయం తీసుకునే అధికారం ఉందని హైకోర్టు వ్యాఖ్యానించింది. ముఖ్యమంత్రిగా నిర్ణయం తీసుకోవచ్చు. కానీ అధికార దుర్వినియోగం చేయడానికి తన మనుషులకు దోచి పెట్టడానికి ముఖ్యమంత్రిగా అధికారం లేదు. రూ.371 కోట్ల ప్రభుత్వ సొమ్ము దోచేశారు. సీమెన్స్ నివేదిక, కొనర్ రిపోర్ట్, ఫోరెన్సిక్ నివేదికను హైకోర్టు పరిగణనలోకి తీసుకోలేదు.
ఇది ఆర్ధిక నేరం. ఐపీసీ నేరం కాదు. ఈ కేసులో కక్ష సాధింపు చర్య లేదని హైకోర్టు స్పష్టం చేసింది. సెక్షన్ 17 ఏ కేసు తీర్పు రిజర్వ్ చేయబడింది. 17 ఏ కేసు క్వాష్ పిటిషన్ లో బెయిల్ అంశం ఉందని మేము హైకోర్టుకి చెప్పినా ఆ అంశాన్నీ హైకోర్టు పరిగణనలోకి తీసుకోలేదు. హైకోర్టు తీర్పులో కనీసం మెన్షన్ చెయ్యలేదు. ఆరోగ్య కారణాల రీత్యా బెయిల్ ఇవ్వాలనుకుంటే జైల్లో 73ఏళ్లు దాటిన వారందరి కోసం సీఆర్పీసీ చట్టం సవరిస్తే గొడవే ఉండదు. స్కిల్ కేసులో న్యాయం జరుగుతుందని నమ్ముతున్నాం కాబట్టి గల్లీ నుంచి ఢిల్లీ వరకు వచ్చాం.జడ్జిని ప్రశించే హక్కు మాకు లేదు. కానీ జడ్జిమెంట్ ని ప్రశ్నించే హక్కు మాకుంది. 17ఏ గురించి ప్రతి ఒక్కరూ చర్చలు చేసి సొంత జడ్జిమెంట్లు ఇస్తున్నారు. చంద్రబాబు బెయిల్ ను సవాల్ చేస్తూ వేసిన పిటిషన్ పై సుప్రీంకోర్టులో డైరీ నెంబర్ వచ్చింది. త్వరగా విచారణకు వచ్చే విధంగా ప్రయత్నాలు చేస్తాం” అని ఏపీ ఏఏజీ పొన్నవోలు సుధాకర్ రెడ్డి తెలిపారు. అయితే పొన్నవోలు కామెంట్స్ పై టీడీపీ నాయ‌కులు ఆగ్రహం వ్యక్తం చేస్తున్నారు. ఆయన తీరు న్యాయవృత్తికే కళంకమని తాజా మీడియా సమావేశంలో ఆగ్రహం వ్యక్తం చేశారు రామ‌య్య.
