Chiranjeevi : మెగాస్టార్ చిరంజీవి సోద‌రుడిగా ఇండ‌స్ట్రీలోకి వచ్చిన పవన్ కళ్యాణ్ ఆన‌తి కాలంలోనే స్టార్ హీరోగా ఎదిగాడు. ఇక ఇప్పుడు రాజ‌కీయ నాయ‌కుడిగా కూడా స‌త్తా చాటుతున్నాడు. పవన్ ఎదుగుద‌ల‌ని చూసి చిరంజీవి చాలా మురిసిపోతుంటారు.పవన్ కల్యాణ్ ఎప్పటికైన ఉన్నత స్థానంలో ఉంటారని ఇటీవల మెగాస్టార్ చిరంజీవి అన్నారు. పవన్ పై కొందరు చేసే విమర్శలు తనను ఎంతో బాధిస్తాయని చిరంజీవి అన్నారు. తన తమ్ముడిపై కొందరు మితిమీరి విమర్శలు చేస్తున్నారని, అవి విన్నప్పుడు తట్టుకోవడం కష్టంగా ఉంటుందన్నారు. ప్రజలకు సేవ చేయాలనే ఉద్దేశంతో రాజకీయాల్లోకి వచ్చిన పవన్ పై కొంతమంది వ్యక్తులు ఉద్దేశపూర్వకంగా విమర్శలు చేస్తున్నారన్నారు. మెగాస్టార్ చిరు తాజా చిత్రం వాల్తేరు వీరయ్య ప్రమోషన్‌లో భాగంగా ఆయన ఈ ఆసక్తికర వ్యాఖ్యలు చేశారు.
నా తమ్ముడిని విమర్శించిన వాళ్లు నా దగ్గరకు వచ్చి పెళ్లిళ్లకు, పేరంటాలకు పిలుస్తారు. పవన్ ను అన్ని మాటలు అన్నవారితో మళ్లీ మాట్లాడాల్సివస్తోందే, వాళ్లను కలవాల్సి వస్తోందే అనే బాధ నాకు ఉంటుంది అని చిరు అన్నారు. పవన్ నా బిడ్డలాంటి వాడు. మా కుటుంబం అంటే పవన్ కు ఎంతో ప్రేమ. డబ్బు, పదవులపై పవన్ కు వ్యామోహం లేదు. నిన్న మొన్నటిదాకా పవన్‌కు సొంత ఇల్లు కూడా లేదు. రాజకీయాల్లో మార్పు తీసుకొచ్చి ప్రజలకు ఏదో మంచి చేయాలనే ఉద్దేశంతో వచ్చాడు. కానీ కొంతమంది అతడిపై ఇష్టం వచ్చినట్లు మాట్లాడుతున్నారు. ఆ మాటలు విన్నప్పుడు మనసు చివుక్కుమంటుంది. పవన్‌ను విమర్శించిన వాళ్లతో నేను మాట్లాడాల్సి వచ్చినప్పుడు కొంత ఇబ్బందిగా ఉంటుంది అని చిరంజీవి చెప్పుకొచ్చారు.
గ‌తంలో ఓ ఇంట‌ర్వ్యూలో నాగ‌బాబు క‌న్నా పవన్ అంటేనే ఎక్కువ‌గా చెబుతుంటారు అని చిరుకి ప్ర‌శ్న ఎదురు కాగా, కళ్యాణ్ చాలా సైలెంట్‌. నా ద‌గ్గ‌ర ఎక్కువ పెరిగాడు. కుటుంబంలో చిన్న‌వాడుకావ‌డం వాడి చుట్టూ అంద‌రు పెద్ద‌వాళ్లు ఉండ‌డంతో సైలెంట్‌గా ఉంటాడు. నేను ఒక‌సారి విదేశాల‌కి వెళ్లి బొమ్మలు తీసుకొస్తే ఇప్ప‌టికి వాటిని చాలా జాగ్ర‌త్త‌గా పెట్టుకున్నాడు. వాళ్ల పిల్ల‌ల‌ని కూడా ట‌చ్ చేయోద్ద‌ని చెబుతుంటాడు. ఆ ర‌కంగా పవన్ కళ్యాణ్, నాకు మ‌ధ్య ప్ర‌త్యేక బాండింగ్ ఉంటుంది. ఫాదర్, స‌న్ బాండింగ్ మా మ‌ధ్య నెల‌కొంది అని చిరు ఎమోష‌న‌ల్ అవుతూ చెప్పారు.
