Nara Lokesh : ప్రస్తుతం ఏపీ రాజ‌కీయాలు వాడివేడిగా సాగుతున్న విష‌యం తెలిసిందే. నారా లోకేష్ యువగళం పేరుతో పాదయాత్ర చేస్తూ వైసీపీ ప్రభుత్వంపై విమర్శలు గుప్పిస్తున్నారు. అలానే ప్ర‌జ‌ల స‌మ‌స్య‌ల గురించి తెలుసుకుంటున్నారు. టీడీపీ జాతీయ ప్రధాన కార్యదర్శి నారా లోకేష్ యువగళం పాదయాత్ర ఒంగోలు, సంతనూతలపాడు అసెంబ్లీ నియోజకవర్గాల్లో ఉత్సాహంగా సాగుతూ పోయింది.ముఖ్యమంత్రి వైఎస్ జగన్మోహన్ రెడ్డి పరిపాలనలో అన్ని రంగాల నిపుణులు బాధితులే అని అసహనం వ్యక్తం చేశారు. ఏపీలో ఎకనామిక్‌ యాక్టివిటీని పూర్తిగా నిలిపివేసి రాష్ట్రాన్ని ఆర్థికంగా చితికిపోయేలా చేశారని మండిపడ్డారు.
ఆంధ్రప్రదేశ్ రాష్ట్రం తిరిగి అభివృద్ధి చెందాలంటే టీడీపీ అధికారంలోకి రావాల్సిందేనని నారా లోకేష్ చెప్పారు. అప్పు చేసి సంక్షేమం చేయడం గొప్ప కాదని.. సంపద సృష్టించి సంక్షేమ పథకాలు అమలు చేసే సామర్థ్యం రాష్ట్రానికి రావాలన్నారు. నిపుణులందరూ ఈ రాష్ట్రాన్ని కాపాడుకోవాల్సిన అవసరం ఉందని లోకేష్ అభిప్రాయపడ్డారు. టీడీపీ అధికారంలోకి వస్తే రాయలసీమని ఎలక్ట్రానిక్స్ అండ్ ఆటోమొబైల్ హబ్‌గా తయారు చేస్తామని హామీ ఇచ్చారు. విశాఖపట్నంను ఐటీ హబ్‌గా మారుస్తామని చెప్పారు. టీడీపీ హయాంలో 6 లక్షల మందికి ఉద్యోగాలు వచ్చాయని వైసీపీ ప్రభుత్వమే శాసనసభ సాక్షిగా ప్రకటించిందన్నారు.
అయితే నారా లోకేష్ సాక్షిగా ఓ యువతి చేసిన కామెంట్స్ ఇప్పుడు హాట్ టాపిక్‌గా మారాయి. ఏపీలో రాను రాను చ‌దువుకున్న వాళ్ల ప‌రిస్థితి దారుణంగా మారింది. రానున్న రోజుల‌లో రైతు బ‌జార్‌లో ట‌మాటాలు అమ్ముకోవ‌డానికి బీటెక్ గ్రాడ్యుయేట్ కావాలి, రోడ్లన్ని మా పార్టీ రంగులు వేయ‌డానికి ఎంటెక్ గ్రాడ్యుయేట్ కావ‌లెను. కాని జీతం అయిదు వేల‌కు మించ‌దు. చంద్ర‌బాబు వ‌ల‌న చ‌దువుకున్న వాళ్ల‌కి ఉపాధి ద‌క్కింది. కాని ఇప్పుడు ప్ర‌భుత్వం వ‌ల‌న మేమంద‌రం ఎన్నో క‌ష్టాలు పడుతున్నాం. మీరు ఎన్నో విప్ల‌వాత్మక‌మైన మార్పులు తెచ్చారు. కాని ఇప్పుడు మా కోడి గుడ్డు క‌ష్టాలు చెప్పుకోవ‌డాన‌కి, అవి విని అర్ధం చేసుకోవ‌డానికి ఉన్న ఒకే వ్య‌క్తి మీరు అన్న అని లోకేష్‌కి తెలియ‌జేసింది ఓ యువతి. ఇప్పుడు ఆ యువతి కామెంట్స్ నెట్టింట వైర‌ల్‌గా మారాయి.
